Túrkistanda kópbalaly ana járdemaqy áperemin dep 70 adamdy aldaǵan

TÚRKІSTAN. QazAqparat – Túrkistan qalasynda kópbalaly ana memleketten qaıtarymsyz járdemaqy alyp beremin dep 70 adamdy aldaǵan. Tergeý barysynda alaıaqqa aınalǵan áıeldiń qylmysyn burynǵy memlekettik qyzmetkermen birge jasaǵany anyqtalǵan, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, alaıaqtardy ustaýǵa jergilikti turǵyndardyń aryzy negiz bolǵan. Ótken jyldyń jeltoqsanynda Túrkistan qalalyq polıtsııa basqarmasyna bir top jergilikti turǵyndar kelip, memleketten qaıtarymsyz járdemaqy alý úshin bir áıelge aldanyp qalǵandaryn jetkizgen. Ol úshin tipti suraǵan aqshasyn da berip, bas-aıaǵy 10 mln teńgege shyǵyndalǵanyn aıtqan. Osy qylmysty ashý úshin basqarmanyń tájirıbeli tergeýshilerinen arnaıy top qurylyp, jurtty taqyrǵa otyrǵyzǵan kúdikti áıeldiń Túrkistan qalasynyń turǵyny ekenin anyqtaıdy. Sondaı-aq tergeý barysynda kópbalaly ananyń sybaılasy retinde burynǵy memlekettik qyzmetker ustalǵan. Ekeýine qatysty 70 alaıaqtyq oqıǵasy anyqtalyp otyr. Soǵan qaramastan qazirdiń ózinde osy seziktilerge qatysty polıtsııaǵa aryzdanýshylar sany artýda. Búgingi kúnge deıin olardyń taǵy 11 alaıaqtyq jasaǵany anyqtalyp, tergeý amaldary qaıta jalǵasýda.

Aıta keteıik, kúdikti áıel 8 balanyń anasy. Tuńǵyshy turmysta bolsa, eń kenjesi 2 jasar. Qazirgi ýaqytta ol úı qamaǵynda bolsa, memlekettik qyzmetten alastatylǵan er azamatqa qatysty bultartpaý sharasy qoldanylǵan.

«Barlyq faktiler sotqa deıingi tergeýdiń biryńǵaı tizilimine tirkeýge alynyp, QR Qylmystyq kodeksiniń 190-baby «Alaıaqtyq» boıynsha is qozǵalǵan. Naqty dálelin tapqan ister sotqa joldandy» delingen habarlamada.