Túrkistanda qoǵamdyq kóliktiń qyzmet kórsetýine reıd júrgizildi

TÚRKІSTAN. QazAqparat – Túrkistan qalalyq jolaýshylar kóligi jáne avtomobıl joldary bóliminiń uıymdastyrýymen qoǵamdyq kólikke reıd júrgizildi. Bul shara kún sanap túlep jatqan shahardaǵy qoǵamdyq kóliktiń qala jurtshylyǵyna sapaly qyzmet kórsetýin qatań baqylaý maqsatynda uıymdastyryldy, dep habarlaıdy QazAqparat tilshisi.

Atalǵan reıdte kólikterdiń jol júrýin baqylaýdyń naqty talaptary men sharttaryna mán berildi. Sondaı-aq, avtobýstardyń baǵyty men memlekettik nómiri, kelgen ýaqyty men GPS qurylǵysynyń bar-joǵy tekserildi.

Beınebaqylaý kamerasynyń ornatylǵany men júrgizýshi jáne kondýktor kıim úlgisiniń sáıkes kelýi, salonynda tarıf týraly aqparat paraqtarynyń ólshemge saı kelýi sekildi erejeler basty nazarǵa alyndy. Tekseris barysynda aıaldamalar boıynsha birneshe kólik qadaǵalandy.

Saralaı kele joǵarydaǵy erejelerge saı nátıje shyǵaryldy. «Jeńis saıabaǵy» aıaldamasy men «Otyrar» móltekaýdany mańyndaǵy aıaldamalardan da ýaqytqa baılanysty jáne basqa da kemshilikter anyqtaldy.

Avtobýs kútken turǵyndar keı kólikterdiń qyzmet kórsetý sapasyna kóńili tolmaıtynyn jetkizdi.

Sharany uıymdastyrýshy tarap kólik ıelerine eskertý jasap, jol erejesin saqtaýdy talap etti.