Túrkistanda klıentterdiń atynan nesıe alǵan bank qyzmetkeri 40 mln teńgeni qaltasyna basqan

TÚRKІSTAN. QazAqparat - Túrkistandyq polıtseıler turǵyndardyń 40 mıllıonnan astam aqshasyn alaıaqtyq jolmen aldy degen kúdikpen burynǵy bank qyzmetkerin ustady, dep habarlaıdy QazAqparat.

Túrkistan qalalyq polıtsııa basqarmasyna shuǵyl habarlama kelip túsken.

Onda bankterdiń biriniń qyzmetkeri ózgelerdiń atynan nesıe alǵany kórsetilgen.

Bul qylmysty túrkistandyq polıtseıler QR QK 190-baby «Alaıaqtyq» boıynsha tirkeýge alyp, oqıǵanyń tolyq mán-jaıyn anyqtaýǵa birden iske kiristi.

Belgili bolǵandaı, bankte aǵa menedjer bolyp jumys isteıtin jas jigit aldyna qandaı da bir máselemen kelgen azamattardyń qujattaryn qoldana otyryp, olardyń atynan nesıe rásimdep otyrǵan.

Barlyǵy 11 adamnyń atyna nesıe shyǵartyp, 3 azamattyń depozıtterindegi aqshalaryn jasyryn túrde aýdaryp alǵan.

Jábirlenýshilerge keltirilgen shyǵyn kólemi 40 mıllıon teńgeden asqan.

Oǵan qosa jas jigit alaıaqtyq jolmen ıelengen aqshalardy qumar oıyndarǵa salyp jibergenin moıyndady.

Jáne óziniń qyzmettik mindetin asyra paıdalanǵan kúdikti jergilikti turǵyn bolyp shyqty.

Túrkistan oblysy polıtseıleri azamattarǵa ózińizge qatysty jeke, qupııa sandardy eshkimge bermeńizder dep eskertedi.