Túrkistanda qazaq ánderiniń halyqaralyq baıqaýy ótti
Eki kúni boıy álem elderinen kelgen qatysýshylar qazaq ánderin shyrqap, óz ónerlerin ortaǵa saldy. Ashylý saltanatyna TÚRKSOI halyqaralyq uıymynyń bas hatshysy Sultan Raev, Túrkistan oblysy ákiminiń orynbasary Sáken Qalqamanov, sonymen qatar elimizdiń tanymal juldyzdary men zııaly qaýym ókilderi qatysty.
Uly Turan dalasyn ánmen terbegen halyqaralyq baıqaýdyń birinshi kúni shartaraptan kelgen qatysýshylar elimizge tanymal estrada ánshilerimen birge qazaq ánderin shyrqap, kórermenge kóterińki kóńil kúı syılady. Ekinshi kúni qatysýshylar aldymen Shámshi Qaldaıaqovtyń «Arys jaǵasynda» ánin birge oryndady.
Sodan soń baıqaý talaby boıynsha qazaqtyń tanymal ánderin shyrqap, qazylar alqasynyń baǵasyn aldy. Ádil qazylar quramynda kompozıtor, QR Memlekettik syılyǵynyń laýreaty Tólegen Muhamedjanov (qazylar alqasy tóraǵasy), ánshi, QR Memlekettik syılyǵynyń laýreaty, Qazaqstannyń, Tatarstannyń halyq ártisi, «Qurmet» ordeniniń ıegeri Nurjamal Úsenbaeva, ánshi, kompozıtor, prodıýser, QR Eńbek sińirgen qaıratkeri, halyqaralyq án baıqaýlarynyń júldegeri Medeý Arynbaev, ánshi, kompozıtor, QR Eńbek sińirgen qaıratkeri Marjan Arapbaeva, ánshi, QR Eńbek sińirgen qaıratkeri, kompozıtor, halyqaralyq án baıqaýlarynyń júldegeri Janar Duǵalova, dástúrli ánshi, QR Mádenıet qaıratkeri, Aıgúl Qosanova, kompozıtor, QR Mádenıet qaıratkeri Bekjigit Serdáli bar.
Qazylar alqasynyń sheshimimen Grýzııa elinen kelgen Tatııa Kobaladze Gran-prı ıegeri atandy. Al 1-oryn Tatarstannan kelgen Ilgız Shaıhrazıevqa buıyrdy. Júldeli 2-oryndy serbııalyq Stefan Zdravkovıch pen Polsha ánshisi Mıhal Kachmarek ıelendi. Úshinshi oryn Katarına Bogıchevıch (Chernogorııa), Hrıstıana Dankova (Bolgarııa), Navrýza Mahamadjanovaǵa (Ózbekstan) buıyrdy. Jeńimpaz ben júldegerlerge arnaıy dıplomdar men qarjylaı syılyqtar, al Gran-prı ıegerine arnaıy statýetka tabystaldy.
Aıta keteıik, buǵan deıin atalmysh baıqaý 2 ret onlaın túrde ótken bolatyn. 2020 jyly Moldova respýblıkasynan Galına Shkoda bas júldeni jeńip alsa, 2021 jyly býrıatııalyq Tsyden Eshı Bımbaev Gran-prı ıegeri atanǵan. Jobanyń bas prodıýsseri – Meıirjan Alıakbarov. Halyqaralyq án saıynyń nátıjesinde 4 eldiń úzdik ánshilerinen qurylǵan «Turan Boys» kvarteti baıqaýdyń jabylý saltanatynda án shyrqady. Búginde olar qazaq ánderin nasıhattaýda zor úles qosyp júr.