Túrkistanda qarjylyq saýattylyqty arttyrýdyń joldary aıtyldy

TÚRKІSTAN. QazAqparat – Túrkistanda qarjygerler men kásipkerler jáne isker jandar bas qosyp, el ekonomıkasyna ınvestıtsııa tartý men qarjylyq qyzmetter salasyn órkendetý máselelerin talqylady. Bul shara «Astana» halyqaralyq qarjy ortalyǵynyń ınvestorlary aptalyǵy» aıasynda uıymdastyryldy, dep habarlaıdy QazAqparat tilshisi.

Aptalyqty uıymdastyrýshylar halyqaralyq qarjy alańynda tirkelgen kompanııalarǵa barlyq jaǵdaı jasalǵanyn aıtady. Kásipkerler de mundaı forýmdardyń paıdasyn sezinip, ınvestıtsııa tartý úshin qajet aqparat alýǵa umtylady dep otyr.

«Olar sot daýyn da osy ortalyq kómegimen sheshe alady. Bizde qazir 20 halyqaralyq arbıtr bar. Olar onlaın rejımde daýdy jan-jaqty qarap, taldaı alady. Ári tájirıbesi de mol. Sonymen qatar sheteldik jumys kúshin de tartýǵa bolady. Biraq bul is barynsha ashyq ári jeńil bolýy kerek. Qazaqstanǵa kelgen kompanııalar ınvestıtsııa quıýy úshin túrli bıýrokratııalyq kedergiler meılinshe az bolýy tıis», - deıdi AHQO ákimshiligi basqarma tóraǵasynyń keńesshisi Bolatbek Qýandyqov.

Basqosýda kásipkerlerge AHQO-da bıznes júrgizý múmkindikteri men ortalyqqa qatysýshy atanýdyń joldary úıretildi. Sondaı-aq, qandaı quqyqtyq kómekter kórsetiletini jáne AHQO-daǵy jasyl qarjylandyrý múmkinditeri men keleshegi jaıly aıtyldy. Al, Islamdyq qarjy men bıznes habynyń bas menedjeri Qazybek Juman ortalyqtaǵy ıslamdyq qarjylandyrý máselelerin túsindirip ótti. Úzilissiz kásibı damý trendterin qamtydy.

«Astana halyqaralyq qarjy ortalyǵynda tirkelgen kompanııalar men qatysýshylar osyndaǵy preferentsııalardy qoldana alady. Salyqtyq jeńildiktermen qatar, aǵylshynnyń sot quqyǵyna negizdelgen Astana halyqaralyq qarjy ortalyǵy halyqaralyq sotynyń tájirıbesin paıdalanady. Munyń alǵysharty byltyr qabyldanǵan bolatyn. Búginde qarjy ortalyǵy halyqaralyq iri qarjy ınstıtýttarymen baılanys ornatqan. Bul uıymdar aımaqtardy damytýǵa at salysýǵa ázir»,-deıdi B.Qýandyqov.