Túrkistanda qar qursaýynda qalǵan jolaýshylardyń vıdeosy tarady
Jelide Túrkistan oblysynda qar qursaýynda qalyp qoıǵan jolaýshylardyń vıdeosy tarady. Onda Sozaq-Báıdibek jol boıyndaǵy boranda qalyp qoıǵan jolaýshylardyń bet álpetterine kirpikteri men qastaryna muz qatyp qalǵanyn kórýge bolady.
«11 aqpan. Sozaq asýyndamyz. Kóligimiz batyp qaldy» deıdi vıdeoǵa túsirgen jolaýshynyń biri.
Tótenshe jaǵdaı departamentiniń baspasóz qyzmeti qutqarýshylardyń táýlik talǵamaı jumys istep jatqanyn jetkizdi.
«Qazir Sozaq-Báıdibek joly jabyq. Qalyp ketken adam joq. Tótenshe jaǵdaı qyzmetiniń mamandary táýlik talǵamaı jumys istep jatyr» - delingen Tótenshe jaǵdaı departamentiniń baspasóz qyzmeti taratqan aqparatta.
Aıta keteıik, budan aldyn Túrkistan oblysynda jol jabylyp, 600-ge jýyq jolaýshy kólikterde aıaldap otyrǵanyn jazǵan bolatynbyz.