Túrkistanda qandaı taýarlar eksporttalady

TÚRKІSTAN. QazAqparat – Túrkistan oblysynda syrtqy saýda eksporty damyp, qarqyndy júzege asyrylýda. Óńirde otandyq taýar óndirýshilerdiń eksportyn ilgeriletý boıynsha belsendi jumys júrgizilýde, dep habarlaıdy QazAqparat tilshisi.

Aımaqta negizgi shıkizattyq emes eksporttalatyn taýarlar qatarynda ýran, un, transformatorlar men balyq ónimderi jáne kúrketaýyq eti bar. Investorlar men eksporttaýshylarǵa «bir tereze» qaǵıdaty boıynsha qyzmetterdiń keń túrin usynatyn «Turkiston Invest» qyzmet kórsetý ortalyǵy qurylǵan.

Sondaı-aq, «Turkiston Invest» ortalyǵynyń kómegine júginýshi kásipkerlerdiń qatary da kóbeıgen. Máselen, kompanııalar atalǵan ortalyqtyń kómegimen kólik qyzmetterine, sheteldik kórmelerge qatysýǵa jáne taýardy shetelde jarnamalaýǵa jumsalǵan shyǵyndardy óteý úshin ótinim bere alady. Búginde «QazIndustry «SOO» AQ - na Túrkistan oblysynyń 18 eksporttaýshy kompanııasy ótinim túsirgen. Onyń ishinde ótken jyly iske qosylǵan «CG Corp Global» JShS bar. Jylyna 400 myń tez daıyndalatyn kespe shyǵaratyn zaýyt ónimi búginde ishki jáne syrtqy naryqta da suranysqa ıe. Sonymen qatar, ótken jyly Qazaqstan men Qytaı arasynda sút ónimderin eksporttaý boıynsha kelisim jasalǵan bolatyn. Nátıjesinde «Golden Camel Group» zaýyty aǵymdaǵy jyldyń naýryz aıynan bastap Qytaıǵa 30 tonna qurǵaq túıe sútin eksporttaǵan. Zaýyttyń óndiristik qýaty jylyna 33 myń tonnany quraıdy jáne ónim tolyǵymen eksportqa saı keledi. Al, taıaýda Ózbekstan Respýblıkasynyń Ýrgench qalasynda ótken «agroónerkásiptik kooperatsııa, ónerkásip jáne týrızm salasyndaǵy óńirlik bıznestiń yntymaqtastyǵy» ІІ aımaqaralyq yntymaqtastyq forýmy aıasynda Túrkistan oblysy men ózbekstandyq kásiporyndar arasynda jalpy somasy 50 mln AQSh dollaryn quraıtyn 3 eksporttyq kelisimge qol qoıyldy. Óńirde sondaı-aq, eksportqa baǵdarlanǵan «Standard Petroleum» JShS munaı óńdeý zaýyty boı kóteredi. Jańa zaýyt Ordabasy aýdanynda 2021 jyly iske qosylmaq. Eksport kólemi jylyna 2 mln aqsh dollaryn quraıdy dep kútilýde. Joba ıasynda myńnan astam jańa jumys orny ashylmaq. Jobanyń jalpy quny 95 mlrd teńgeni quraıdy.

Aıta keteıik, aǵymdaǵy jyldyń qańtar-aqpan aılarynda Túrkistan oblysynyń eksport kólemi 54,9 mln AQSh dollaryn (onyń ishinde shıkizattyq emes eksport - 15 mln AQSh) quraǵan.