Túrkistanda «Qamqorlyq» balalardy ońaltý ortalyǵy ashyldy

TÚRKІSTAN. QazAqparat - Jańa tehnologııamen jabdyqtalǵan «Qamqorlyq» balalar ońaltý ortalyǵy júıke júıesi men tirek-qımyl apparatynyń buzylystary bar naýqas balalarǵa em-dom kórsetedi, dep habarlaıdy QazAqparat tilshisi.

«Qamqorlyq» balalardy ońaltý ortalyǵy zamanaýı úlgide jasaqtalǵan. Ortalyqta tuz shahtasy, shýngıt bólmesi, ergoterapııa, sensorlyq bólme, mehanoterapııa, balneoterapııa, ınteraktıvti bólme, emdik dene shynyqtyrý, oıyn bólmeleri bar. Munda 1-14 jas aralyǵyndaǵy júıke júıesi men tirek-qımyl apparatynyń buzylystary bar naýqas balalarǵa kómek kórsetiledi.

Túrkistan oblysynyń ákimi Ómirzaq Shókeev em qabyldap jatqan balalarmen kezdesip, merekemen quttyqtady.

«Oblys ákimdigimen birlese jumys atqaryp, qurylǵylardy alýǵa qoldaý kórsetken «Samuryq-Qazyna» ulttyq ál-aýqat qoryna rahmet aıtamyz. Zamanaýı qural-jabdyqtarmen qamtylǵan bul ońaltý ortalyǵy balalardyń densaýlyǵyn jaqsartýǵa oń yqpalyn tıgizeri anyq», – dedi Ómirzaq Shókeev.

Іs-shara barysynda ońaltý ortalyǵyndaǵy balalarǵa merekelik syılyqtar tapsyryldy.