Túrkistanda halyqaralyq talapqa saı sport keshenderi salynyp jatyr
Olımpıadalyq rezerv mektebiniń ákimshilik ǵımaraty men jataqhanasynyń qurylysy aıaqtalýǵa jaqyn. Besqabatty jataqhana atalǵan mektep shákirtterin, stýdentter men qyzmetkerlerdi ýaqytsha baspanamen qamtamasyz etý maqsatynda salynǵan. 200 oryndyq ǵımarat qurylysy qazan aıynda aqtalady. Búginde ishki árleý jumystary júrgizilip, qural-jabdyqtar ornatyla bastady.
Qalada «Muz saraıynyń» qurylysy da júrip jatyr. Álemdik standarttarǵa saı muzaıdyny 1 200 adamǵa eseptelgen. Jańa nysan jyl sońynda ashylady.
Sondaı-aq, «Tennıs ortalyǵy», B. Sattarhanov atyndaǵy sport kesheni, «At sporty kesheni» sekildi jańa nysandar boı kóterdi. 35 gektar jerde ornalasqan at sporty kesheninde polo-klýb, manej, stendtik atysqa arnalǵan alańqaı, sadaq atýǵa arnalǵan alań, kanal arqyly ótetin kópir men atpen serýendeý aımaǵy bolady.
Óńirde fýtbolǵa aıryqsha qoldaý kórsetilip jatyr. 20 gektar jerde ornalasqan «TURAN» fýtbol akademııasynyń qurylysy da aıaqtalýǵa taıady. Munda sportshylarǵa Eýropanyń úzdik klýbtaryndaǵydaı jaǵdaı jasalady. Jańa keshende 10 fýtbol alańy bolady. Dopıng-baqylaý kabınetteri, 300 oryndy qonaqúı de bar.
Elimizde teńdesi joq eskek esý kanalyna da sý keldi. Oblys ortalyǵyndaǵy sport kesheniniń qurylysy halyqaralyq talaptarǵa saı júrgizilip jatyr. Jalpy aýdany 100 gektarǵa jýyq alańda ornalasqan keshende uzyndyǵy 2,5 shaqyrymǵa sozylatyn sý arnasy salyndy. Qurylystyń ekinshi kezeńi aıaqtalǵan soń, munda sapbordıng, sý shańǵysy, flaıbordıng, veıkserfıng, kanopolo, dragonbot jáne jaǵajaı fýtboly, voleıbol, gandbol, regbı sekildi sý jáne jaǵajaı sportynyń tanymal túrlerinen saıystar ótedi. Eskek esý sportyn jan-jaqty damytýǵa múmkindik jasalady. Ázirge, bul sport túrinen Túrkistan oblysy respýblıkada kósh bastap tur.