Túrkistanda grepplıngten «Túrki álemi» ashyq týrnıri bastaldy

TÚRKІSTAN. QazAqparat - Túrkistan qalasyndaǵy Olympic Center kesheninde jyl saıynǵy halyqaralyq «Túrki álemi» ashyq týrnıri bastaldy, dep habarlaıdy QazAqparat.

Almaty qalalyq grepplıng federatsııasy uıymdastyrǵan saıystyń ótýine Túrkistan oblysynyń ákimdigi men sport basqarmasy jáne «Turkistan Qol Oner Odaǵy» birlestigi qoldaý kórsetken.

ıAǵnı, eki kún boıy ótetin saıysqa qatysýshylar men kórermender túrkistandyq qolónershilerdiń buıymdary qoıylǵan kórmeni de tamashalaıtyn bolady.

Aıta ketsek, grepplıngten ótip jatqan saıysqa Qazaqstan, Qyrǵyzstan, Ózbekstan, Ázerbaıjan jáne Reseı elderinen 500-ge jýyq sportshy qatysýda. Olardyń 400-ge jýyǵy 4-17 jas aralyǵyndaǵy jasóspirimder bolsa, 30-y balalar úıiniń tárbıelenýshileri.