Túrkistanda erte pisetin kókónister ózge óńirlerde tıimdi baǵamen satylady

TÚRKІSTAN. QazAqparat – Túrkistan oblysynda erte pisetin kókónister ózge óńirlerde tıimdi baǵamen satylatyn bolady. Bul týraly Aýyl sharýashylyǵy mınıstrligi ókilderiniń qatysýymen Túrkistan oblysynyń Saryaǵash aýdanynda ótken kóshpeli jıynda aıtyldy, dep habarlaıdy QazAqparat tilshisi.

Memleket basshysy Qasym-Jomart Toqaev aldaǵy úsh jylda azyq-túlik qaýipsizdigi máselesin túbegeıli sheshý mindetin qoıǵan bolatyn. Basty maqsat – aýyl sharýashylyǵy sýbektilerin, bıznes ókilderin qoldaı otyryp, baǵa turaqtylyǵyn qamtamasyz etý. Osyǵan oraı, Túrkistan oblysy, Saryaǵash aýdanynda Túrkistan óńirinde erte pisetin kókónisterdi ózge oblystar men qalalarǵa jóneltýge forvardtyq kelisimshart jasaqtaý jóninde kóshpeli jıyn ótti. Osy kelisim arqyly kókónister tıimdi baǵada saýdalanbaq.

Kóshpeli jınalysqa Aýyl sharýashylyǵy mınıstrligi eginshilik deparmenti melıoratsııa basqarmasynyń basshysy Medet Jádigeruly, Túrkistan oblysy aýyl sharýashylyǵy basqarmasy basshysynyń mindetin atqarýshy Nurjigit Myrzahmetov, «Túrkistan» áleýmettik-kásipkerlik korporatsııasy» aktsıonerlik qoǵamynyń basqarma tóraǵasy Faızýlla Baıdýllaev, oblys jáne oblystyq mańyzy bar qala ákimdikteriniń salalyq orynbasarlary, áleýmettik kásipkerlik korporatsııalary, qarjy mekemeleri, aýyl sharýashylyǵy salasynyń ókilderi, iri saýda jelileriniń basshylary jáne kásipkerler qatysty.

Májiliste Túrkistan oblysynyń aýyl sharýashylyǵyn damytýda elimizdegi eń qolaıly óńir ekeni aıtylyp, múmkindikteri saralandy. Oblysta kókónister basqa óńirlerge qaraǵanda 1,5-2 aı buryn jınalady. Jyldyq tutyný normasyna sáıkes oblys halqy kartop, sábizben 1,5 ese, pııazben 4,4 ese jáne qyryqqabatpen 6,6 ese qamtamasyz etiledi. Demek, Túrkistan oblysy dıqandarynyń respýblıka halqyn áleýmettik mańyzy bar erte mezgildik kartop, pııaz, sábiz ónimderimen qamtýǵa tolyq múmkindigi bar.

Aýyl sharýashylyǵy daqyldaryn ártaraptandyrý aıasynda bıyl Túrkistan óńirinde erte pisetin kartopty 9,02 myń gektarǵa, pııazdy 2,0 myń gektarǵa, sábizdi 1,24 myń gektarǵa jáne qyryqqabatty 7,54 myń gektarǵa egý josparlanǵan. Nátıjesinde 186,3 myń tonna kartop, 55,5 myń tonna pııaz, 30,4 myń tonna sábiz jáne 187,2 myń tonna qyryqqabat alý kózdelip otyr.

Kóshpeli májilis barysynda Túrkistan oblysy ákimdigi men oblys jáne oblystyq mańyzy bar qala ákimdikteri arasynda aýyl sharýashylyǵy ónimderin ótkizý jónindegi ózara yntymaqtastyq týraly Memorandýmǵa qol qoıyldy. Oblys ákimdigi tarapynan Aýyl sharýashylyǵy mınıstrligine kóktemgi dala jumystaryna beriletin jeńildetilgen nesıe kólemin ulǵaıtý jóninde usynystar engizildi.

Foto: Túrkistan oblysy ákimdigi