Túrkistanda eń úlken stýdentter úıiniń irgetasy qalandy

TÚRKІSTAN. QazAqparat – Túrkistan qalasynda Q.A.ıAsaýı atyndaǵy Halyqaralyq qazaq-túrik ýnıversıtetiniń stýdentterine arnalǵan jańa jataqhananyń irgetasy qalandy. 500 oryndyq 3 jataqhananyń jalpy aýmaǵy 40 myń shashy metrdi quraıtyn bolady, dep habarlaıdy QazAqparat tilshisi.

Elimizdiń Tuńǵysh Prezıdenti Nursultan Nazarbaevtyń bes áleýmettik bastamasynda stýdentterdi jataqhanamen qamtamasyz etý máselesi kóterilgen bolatyn. Osy mindetterdi júzege asyrý maqsatynda, alys jaqyn shetel men elimizdiń alys aımaqtarynan kelip oqıtyn bilimgerlerdi jatyn oryndarmen qamtý úshin 1500 oryndyq nysan salynbaq. Qazirgi tańda oqý ornynda 10 myńnan astam stýdent bilim alýda. Qashyqtyqtan bilim alyp jatqan stýdentter keler jyly zamanaýı úlgidegi jaıly jataqhanaǵa ornalasatyn bolady.

«Elimizdiń eń qasterli merekesi Táýelsizdik kúnimen barshańyzdy quttyqtaımyn. Búgingi zamanaýı úlgide salynatyn 500 oryndyq 3 jataqhananyń jobasymen tanystyq. Jataqhana qurylysy josparlanǵan ýaqytta aıaqtalyp, stýdentter jańa qonystaryna jaıǵasatyn bolady. Oblys basshylyǵy tarapynan jan-jaqty qoldaý kórsetiledi»,- dedi is-sharada sóz alǵan Túrkistan oblysynyń orynbasary Arman Sábıtov.

Jataqhanada stýdentterdiń jaıly turýy, oqýy, demalýy úshin barlyq jaǵdaılar jasalmaq. Sondaı-aq, stýdentterdiń bos ýaqytyn tıimdi paıdalanýyna arnalǵan demalys alańdarymen, «Workout» sportpen aınalysý alańdarymen, avtokólik jáne velosıped turaqtarymen jabdyqtalatyn bolady. Trenajer zaly, sonyń ishinde balalar zaly, kafe, Jastar ortalyǵy, saýda úı-jaıy, ashana jáne sulýlyq salony, 140 oryndyq qonaq úı, sýpermarket, stomatologııa, saýda oryndary ashylmaq. Stýdenttik turǵyn úı kesheninde jastarǵa jáne otbasylyq juptarǵa, halyqtyń qaýqary az toptaryna baǵdarlanǵan stýdenttik jataqhanalardyń tolyqqandy aımaǵyn qalyptastyrý qamtamasyz etiledi dep josparlanýda.

«Elimizdiń barlyq aımaǵynda sońǵy eki jyldyń ishinde jataqhanalar salý isi qolǵa alynyp jatyr. Búgin Táýelsizdik merekesi qarsańynda Túrkistan qalasynda Ahmet ıAsaýı ýnıversıtetiniń jastaryna arnalǵan eńseli 1500 oryndyq jataqhananyń irgetasy qalandy. Elbasymyz N.Nazarbaevqa, Prezıdentimiz Q.Toqaevqa, oblys basshylyǵyna alǵysymyz sheksiz. Zamanaýı úlgide boı kóteretin jańa jataqhananyń salynýy ýnıversıtetimiz úshin tarıhı sát»,-dedi Ýnıversıtet prezıdenti Bolatbek Abdrasılov.