Túrkistanda din men dástúr sabaqtastyǵy talqylandy

TÚRKІSTAN. QazAqparat - Q.A. ıAsaýı atyndaǵy halyqaralyq qazaq-túrik ýnıversıtetinde Túrkistan oblysy qoǵamdyq damý basqarmasynyń uıymdastyrýymen elimizdegi dinı turaqtylyqty qamtamasyz etý, memlekettiń zaıyrly qaǵıdalaryn nyǵaıtý maqsatynda oblystyq aqparattyq-túsindirý toby músheleriniń semınary ótti. Bul jóninde oblys ákiminiń baspasóz qyzmetine silteme jasap QazAqparat habarlaıdy.

Sharada aqparattyq-túsindirý toby músheleriniń biliktiligin kóterý, dinı ekstremızmdi nasıhattaýdyń aldyn alý, ásirese ınternet pen áleýmettik jelide saqtaný sharalaryn jetildirý men qoǵamda kereǵar aǵymdarǵa qarsy turatyn biryńǵaı ımmýnıtet qalyptastyrý jaıy sóz boldy.

Semınar-trenıngke QMDB janyndaǵy respýblıkalyq aqparattyq túsindirý tobynyń múshesi Arman Qýanyshbaev, belgili dintanýshy Muqan Isahan, qalalyq, aýdandyq ishki saıasat bólimderiniń basshylary men din salasyna jaýapty qyzmetkerler, joǵary, orta arnaýly oqý oryndarynyń oqytýshylary jáne magıstranttary, QMDB Túrkistan oblysy boıynsha ókili, qala, aýdandardyń bas ımamdary, qala, aýdandardyń jalpy orta mektepteriniń «Zaıyrlylyq jáne dintaný negizderi» pániniń muǵalimderi, sondaı-aq, buqaralyq aqparat quraldarynyń ókilderi qatysty.

Semınar-trenıngti Túrkistan oblysy qoǵamdyq damý basqarma basshysy orynbasarynyń mindetin atqarýshy Dáýren Sarıev ashyp, júrgizip otyrdy.

«Qazirgi kezde Qazaqstanda áleýmettik-saıası ómirde dinniń róli arta tústi. Din qoǵamdaǵy rýhanı mádenı salanyń asa mańyzdy bólikteriniń birine, tuǵyrly áleýmettik ınstıtýtqa aınalyp keledi. Halqymyzdyń edáýir bóligi naq osy din arqyly dástúrli qundylyqtar men qoǵamdyq parasattyq ustanymdaryn qaıta jańǵyrtýǵa umtylýda. Búgingi sharanyń maqsaty - elimizdegi dinı turaqtylyqty qamtamasyz etý, memlekettiń zaıyrly qaǵıdalaryn nyǵaıtý bolyp otyr», - dep atap ótti ol.

Kezdesý barysynda QMDB janyndaǵy respýblıkalyq aqparattyq túsindirý tobynyń múshesi Arman Qýanyshbaev, dintanýshy Muqan Isahan, QMDB-nyń Túrkistan oblysy boıynsha ókil ımamy M. Aqtamberdi trenıngke qatysýshylarǵa zaıyrly memlekette ómir súrip jatqanymyzdy eskere otyra eldiń tynyshtyǵy men keleshegi úshin dinniń týra jolynan jańylmaýymyz kerek ekenin túsindirdi.

Elimizge tanymal ustaz Arman Qýanyshbaev din men dástúr sabaqtastyǵy búginde úlken ról atqaratynyn, qazaqtyń salty men sanasy Islam dinimizdiń tamyryna negizdelgenin jetkizdi. Keleshek urpaqtyń ulty úshin qyzmet etýine barlyq ata-analar tal besikten tárbıe berý kerektigin de tilge tıek etti.

Kezdesý sońynda qatysýshylarǵa arnaıy sertıfıkattar tabystaldy.