Túrkistanda bir kúnde 500-ge jýyq kópbalaly ana qonys toıyn toılady

TÚRKІSTAN. QazAqparat - Jańa jyl merekesi qarsańynda Túrkistan qalasynda 610 otbasy páterli boldy. Onyń 470-i – kópbalaly ana, dep habarlaıdy QazAqparat tilshisi.

Túrkistan oblysynyń ákimi Ómirzaq Shókeev turǵyndarǵa páter kiltin tapsyryp, qýanyshyn bólisti.

Sondaı-aq, Elbasy Nursultan Nazarbaev pen Memleket basshysy Qasym-Jomart Toqaevtyń memleketti damytyp, Túrkistanǵa aıryqsha qoldaý kórsetip jatqanyn atap ótti.

– Túrkistanymyz túrlenip, týrıster sany kóbeıip keledi. Ákimshilik-iskerlik aýmaǵynda kópqabatty, záýlim úıler boı kóterip jatyr. Úılermen qatar qalamyzda kóptegen áleýmettik, mádenı jáne sporttyq nysandar salyndy. Kelesi jyly «Túrkistan-Shymkent-Tashkent» temirjolyn salý jumysy bastalyp, megajoba qolǵa alynady. Túrkistannyń jan-jaǵyn sýlandyrý, sý qoımalary men jasandy kólderdi kóbeıtý júzege asýda. Bunyń bári – Táýelsizdigimizdiń jemisi – dedi Ómirzaq Estaıuly.

Saltanatty jıynda Túrkistan oblystyq Aqsaqaldar alqasynyń tóraǵasy Jarylqasyn Áziretbergenov jurtshylyqty quttyqtady.

Uzaq ýaqyt kútip, búgin armandary oryndalyp, qýanyshqa kenelgen turǵyndar basshylarǵa rızashylyqtaryn bildirip, alǵystaryn aıtty.

Sonymen qatar bıyl baspanaǵa qoljetimdilikti arttyrý maqsatynda Túrkistan qalasyndaǵy ákimshilik-iskerlik ortalyǵy aýmaǵyndaǵy 14 kópqabatty turǵyn úıdiń 763 páteri «Otbasy bank» arqyly jáne kópqabatty 3 turǵyn úıdiń 151 páteri «7-20-25» baǵdarlamasy arqyly turǵyndarǵa usynyldy.

Keleshekte de bul jumystar jalǵasyn tabady.

Oblys ortalyǵynda qazirgi tańda bıýdjet esebinen 7, 9 jáne 12 qabatty 67 turǵyn úıdiń qurylysy júrgizilip jatyr.