Túrkistanda Bekzat Sattarhanov týraly fılmniń tusaýy kesildi

TÚRKІSTAN. ​QazAqparat - Túrkistanda jańadan jaryq kórgen «Bekzat» kórkem fılminiń tusaýy kesildi. «Habar» agenttiginiń tapsyrysymen túsirilgen týyndy Sıdneı Olımpıadasynyń chempıony, jasyndaı jarq etken juldyz, boksshy Bekzat Sattarhanovqa arnalǵan, dep habarlaıdy QazAqparat tilshisi.

Kartınanyń tusaýkeserinde sóz alǵan​ «Habar» agenttigi AQ Basqarma tóraǵasynyń birinshi orynbasary Rınat Kertaev jer jahanǵa​ 20 jasynda óz eliniń atyn tanytyp ketken B. Sattarhanov barlyq ıgi iltıpatqa laıyq ekenin atap ótti.

«Jasyndaı jarq etken jas ǵumyrdyń erte úzilgeni qaı-qaısymyzdyń da qabyrǵamyzdy qaıystyrdy. Bekzattaı batyrdyń bolmysyn búgingi urpaqtyń jadyna jetkizý, búgingi urpaq​ sanasyna sińirý – barshamyzdyń paryzymyz. Sondyqtan da, «Habar» agenttigi, Sıdneı Olımpıadasynyń chempıony, belgili boksshy​ - Bekzat Sattarhanov týraly​ tuńǵysh avtobıografııalyq «Bekzat»​ dramasyn taspalaýdy uıǵardy. Maqsatymyz - erte sóngen juldyzdyń​ sanaýly ǵumyryndaǵy jigerli jetistikterin, qaıtpas qaısarlyǵyn, ultjandylyǵy men namysqoılyǵyn kórsetý arqyly búgingi jas urpaqty rýhtandyrý, jas sportshylarymyzǵa buqaralyq salaýatty ómir saltyn nasıhattaý bolyp tabylady», - dedi ol.

​Fılmniń alǵashqy kórsetilimine, sondaı-aq dańqty sportshynyń ata-anasy, týystary qatysty.

«20 jas ǵumyrynda qolynan kelgenshe eline barlyq kúsh-jigerin berip ketti. Bekzatqa qandaı marapat, qandaı kıno shyǵarsa da artyq bolmas. Bekzatty jastardyń aldyna úlgi etip qoısa... onyń ımandylyǵy, úlkendi syılaýy, qazaqylyǵy, birbettiligi, alǵa qoıǵan maqsatyn oryndaıtyn minezi qazirgi qazaq jastaryna kerek», - dedi marqum sportshynyń ákesi Seıilhan Sattarhanov.

Týyndy sıýjetinde boksshy ómiriniń úsh kezeńi qamtylady: balalyq shaǵy, boz bala kezeńi jáne ómiriniń sońǵy sáti. 90-jyldardyń basyndaǵy qıyn-qystaý zamanǵa tap kelgen Bekzattyń balalyǵy kóp qıyndyqtarmen ótedi. Túrkistan qalasyndaǵy temir joldy boılaı ornalasqan shaǵyn aýyldyń qarapaıym tirshiligi bala Bekzattyń kózimen beınelenedi. Onyń armany, namysqoı bitimi árbir sátte synalyp otyrady.

Birde ata-anasy Bekzatty kúreske qatyssyn dep bapkerge aparady. Onda ol sergektigimen kózge túsedi. Degenmen kúreske qatysqan balanyń boıy óspeı qalady degen túsinikpen ony boksqa aýystyrady. Bapkerimen tanysqan kúnnen bastap, bul sport túrine erekshe mahabbaty ashylady. Kún saıyn erinbeı jattyǵyp, alǵash ret Túrkistanda ótken saıysta jarqyrap kórinedi. Boz bala shaǵynda Germanııada ótken týrnırde top jaryp, bapkerler Olımpıadaǵa daıarlaý jattyǵýlaryna qabyldaıdy. 1999 jyly Tashkentte ótken búkil Azııa birinshiliginde kúmis júldege ıe bolyp, Olımpıada oıyndaryna joldama alady. Solaı, 2000 jyly Sıdneıde tartysty oıyndar ótkizip, altyn medalǵa ıe bolady.

Kartınanyń rejısseri - Murat Bıdosov, stsenarııin Serjan Zakeruly jazǵan.​

Fılmniń túsirilim jumystary Túrkistan, Almaty jáne Ystanbul qalalarynda ótken. Basty róldi jas akter Samat Ázimqulov oınaıdy. Ol 2006-2007 jyldary kıkbokstan jastar arasynda eki ret Qazaqstan chempıony bolǵan. Sonymen qatar týyndydan Ǵalymbek Ospanov, Murat Jarylqasynov, Maıra Maqulbekova, Dýlyǵa Aqmolda, Qýanysh Muqataı, Baqdáýlet Shaımahan jáne basqa akterlerdi kórýge bolady.

Tolyq metrajdy kartına 3 qazannan bastap elimizdiń barlyq kınoteatrlarynda kórsetiledi.