Túrkistanda Balalardy ońaltý ortalyǵy ashyldy

TÚRKІSTAN. QazAqparat – Túrkistan oblysynyń ákimi Ómirzaq Shókeev jańadan ashylǵan saýyqtyrý ortalyǵynyń tusaýyn kesip, Elbasynyń daryndy jastardy anyqtaý jáne qoldaý boıynsha «El úmiti» bastamasynyń jeńimpazdaryn marapattady, dep habarlaıdy QazAqparat tilshisi.

«Elbasy medali» boıynsha bes baǵytta kósh bastaǵan Saryaǵash aýdanynyń oqýshysy Marǵulan Ádilbek, «Myń bala» ulttyq olımpıadasynyń júldegeri, Jetisaı aýdanynyń «Daryn» mektep-ınternatynyń oqýshysy Ótelbaı Dáýirhan, Shymkent qalasyndaǵy er balalarǵa arnalǵan lıtseı - ınternatynyń oqýshysy Sherhan Jambekov arnaıy medaldarǵa ıe boldy.

Nursultan Nazarbaev qorynyń «Qamqorlyq» ońaltý ortalyǵy Túrkistan oblystyq balalar aýrýhanasynyń tusynan ashyldy. AQSh, Italııa, Germanııa, Avstrııa jáne Reseı memleketterinen ákelingen 100-ge jýyq jańa qural-jabdyqpen qamtylǵan.

Ortalyq Túrkistan oblysy men Shymkent qalasynyń balalaryn qabyldaıdy. Mundaǵy tıimdi emdeý tásiliniń biri - ǵaryshkerlerge arnalǵan sensorly kıim. Saýyqtyrý ortalyǵynda «Tirkeýge arnalǵan aýdıometrııalyq modýl» ornatylǵan. Óńirdegi alǵashqy qurylǵynyń kómegimen jańa týǵan nárestelerden bastap, gıperkınetıkalyq sal aýrýy jáne aýtızmmen aýyratyn naýqastardy zertteýge múmkindik beredi. Sondaı-aq, beıne-elektroentsefalografııa kabıneti jumys isteıtin bolady. Bul erekshe qamqorlyqty qajet etetin balalar úshin taptyrmaıtyn múmkindik. Jalpy 500 sharshy metrdi qamtıtyn ortalyqta mehanoterapııaǵa arnalǵan jabdyqtar, ıppoterapııaǵa arnalǵan s-rider Sky trenajeri, «Atlant» neıro-ortopedııalyq pnevmokostıými, «Mýltısteneder Djenks» trenajeri, júrýge jáne aıaq-qoldarǵa arnalǵan trenajer, pozıtsııalyq júıeler, montessorı damytýshy trenajerlar jıyntyǵy men qoldyń usaq motorıkasyn damytýǵa arnalǵan oıyn terapııasy jıyntyqtarymen jasaqtalǵan.

Ortalyqta bilikti mamandar sońǵy emdik ádisterdi paıdalana otyryp neıro-ortopedııalyq aqaýy bar balalar men jasóspirimderge keshendi medıtsınalyq-áleýmettik jáne psıhologııalyq-pedagogıkalyq kómek kórsetip, saýyqtyrý sharalaryn júrgizedi. 17 maman, onyń ishinde reabılıtolog, fızıoterapevt, 5 LFK nusqaýshysy, neonatolog, nevrolog, logoped, defektolog, psıholog dárigerleri jumys isteıdi. Mamandardyń barlyǵy arnaıy daıarlyqtan ótken. Ońaltý kýrsy 21 kúndi quraıdy.

Munda jylyna 360 balany saýyqtyrý josparlanýda. Erte damý ortalyǵyndaǵy keshendi emi múmkindigi shekteýli balalardyń áleýmettik jáne aqyl, dene jaǵynan damyp jetilýin qalyptastyrýǵa septigin tıgizedi. Atap aıtqanda, qozǵalys pen sóıleýdegi kórsetkishterin qalpyna keltirýge múmkindik beredi.