Túrkistanda Astana kúni toılandy

TÚRKІSTAN. QazAqparat -Túrkistan qalasynda Astananyń 20 jyldyq merekesine arnalǵan gala-kontsert ótti, dep habarlaıdy QazAqparat ákimniń baspasóz qyzmetine silteme jasap.

Esimhan alańynda ótken kontsertke myńdaǵan kórermen qatysty. Saltanatty sharada Túrkistan oblysynyń ákimi Janseıit Túımebaev kópshilikti merekemen quttyqtady.

  «Qazaq eliniń jasampaz tarıhynda altyn árippen jazylatyn merekelerdiń biri - Astana kúni. Biz táýelsizdigimiz týraly aıtsaq, Astanany aıtpaı tura almaımyz. Óıtkeni, Elbasy jáne elorda, Táýelsizdik pen Tuńǵysh Prezıdenttiń esimi ajyramas, aınymas egiz uǵym. Astana - Elbasymyzdyń tól týyndysy. Saryarqa tósinde gaýhartastaı jarqyrap turǵan elordamyz búgingi tańda álemniń tańdanysyn oıatqan, bárin moıyndatqan ǵalamat joba. Bıyl Astananyń 20 jyldyq mereıtoıyn toılap otyrmyz. Táýelsizdigimizdiń boıtumary - Astana kúnnen kúnge jarqyrap-jaınap, elimizdiń abyroıyn, memleketimizdiń kelbetin asqaqtatyp keledi. Astana elimizdiń barlyq óńirleriniń ekonomıkasynyń damýyna yqpal etken qozǵaýshy kúshke aınaldy. Astana - beıbitshilik, yntymaqtastyq jáne kelisim ordasy. Sizderdi taǵy da Astana kúnimen shyn júrekten quttyqtaı otyryp, barlyqtaryńyzǵa zor densaýlyq, otbasylaryńyzǵa amandyq, baqytty ǵumyr tileımin» dedi J.Túımebaev.

Dýmandy merekede óńir basshysy qoǵamnyń túrli salalarynda jemisti eńbek etip júrgen bir top azamatqa «Astanaǵa 20 jyl» merekelik medalyn saltanatty túrde tapsyrdy. Olardyń arasynda sport, óner, BAQ jáne ózge de salalardyń ókilderi bar. Sonymen qatar, J.Túımebaev bıyl UBT qorytyndysy boıynsha eń joǵary ball jınaǵan Túrkistan oblysynyń 20 órenine Alǵys hat tapsyryp, úlken ómirge basqan qadamdaryna sát-sapar tiledi.

Túrkistan tórindegi gala-kontsertte oblysymyzǵa jáne elimizge tanymal estrada juldyzdary men óner ujymdary óner kórsetti. Keshte Otan, týǵan jer, mahabbat, Astana, dostyq taqyrybyndaǵy týyndylar men el júreginen máńgi oryn alǵan ánder shyrqaldy. Kesh sońy merekelik otshashýǵa ulasty.