Túrkistanda arnaıy ekonomıkalyq aımaq qurý bastamasy óte oryndy – Nurmuhamed Baıǵaraev
Sarapshy Qazaqstan úshin Túrki ıntegratsııasyn ózge de ıntegratsııalyq jobalarmen qatar alyp júrý mańyzdy ekenin aıtady.
«Meniń oıymsha, keshegi beıresmı sammıttiń ótýiniń ózi mańyzdy. Qazaqstanǵa Túrki ıntegratsııasy óte qajet dep oılaımyn. Sebebi, Eýrazııalyq Ekonomıkalyq Odaq boıynsha bir baǵytqa ǵana táýeldi bolyp qalmaý úshin oǵan balans retinde, tepe-teńdikti saqtaý úshin túrki baǵytyndaǵy ıntegratsııany da qatar alyp júrgenimiz kerek. Ekonomıkalyq múddeler bolǵanymen, kóp jaǵdaıda kez kelgen memlekettiń túpki bolmysyna, tegine qaraı tartylatyny jasyryn emes», - deıdi «Aiqyn» gazetiniń bas redaktory.
Ol, sondaı-aq, Qazaqstan tarapynyń Túrkistanda arnaıy ekonomıkalyq aımaq qurý týraly usynysy aradaǵy yntymaqty jańa deńgeıge shyǵaratyn tetik bolady dep otyr.
«Keshegi sammıtke Qazaqstan bastamashy bolǵandyqtan, Prezıdent Qasym-Jomart Toqaevtyń Túrkistanda arnaıy ekonomıkalyq odaq qurý týraly usynysy da, ıAssaýı atyndaǵy stıpendıǵa 50 grant bólý bastamasy oryndy dep oılaımyn. Kez kelgen ıntegratsııa ekonomıkalyq baǵytty da qamtýy kerek. Árıne, birinshi kezeńde ınstıtýttsııalaný júredi. Ókildikter ashylyp, bilim mádenıet salasynda baılanys jandanǵannan keıin ekonomıkalyq aımaqtyń jumysy qyzady dep topshylap otyrmyn. Sonyń aıasynda arnaıy kompanııalar qurylyp, túrki elderiniń yntymaǵy ekonomıkalyq deńgeıge shyǵady. Sol kezde ǵana memleketter arasynda shynaıy saýda, shynaıy ıntegratsııa bastalýy múmkin. Osy turǵydan alǵanda Túrkistanda arnaıy ekonomıkalyq aımaq qurý óte qajet joba», - dedi saıasattanýshy.
Nurmuhamed Baıǵaraev aradaǵy baılanysty nyǵaıtý úshin týystas elderdiń árqaısysyna 50 granttan bólsek te, kóptik etpeıdi dep esepteıdi.
«50 grant bastamasy boıynsha aıtsaq, Qazaqstannyń múmkindigi osy uıymdaǵy árbir memleketke 50 granttan berýge jetedi. Sebebi, kezinde Qazaqstan Aýǵanstan stýdentterine 1000 grant bergen kezder bolǵan. 10 jyl buryn sondaı múmkindik bolǵan. Qazir de sondaı múmkindik bar. Túrkııa Prezıdentiniń Túrki keńesin uıym deńgeıine shyǵarý qajet degeni de jaqsy usynys. Óıtkeni uıymnyń aty – uıym. Uıym bolǵandyqtan, ol halyqaralyq qatynastardyń quqyq nysanyna aınalady. Onymen ózgeler de sanasatyn bolady. Sonymen birge, mádenı, gýmanıtarlyq baılanystardy ǵana emes, saıası, ekonomıkalyq, áskerı qarym-qatynastardy jandandyrýǵa bolady», - degen sarapshy ıntegratsııa aıasynda keıbir memleketterdiń jeke problemalaryn búkil túrki álemine tańýdan aýlaq bolý kerektigin atap ótti.
«Túrkııa tarapy osy ıntegratsııa aıasynda óziniń Kıprdegi máselelerin kóterip jatyr. Ondaı máselelerden saq bolý kerek. Sondaı-aq, Qarabaq máselesi de kóterildi. Iá, ol Ázerbaıjannyń jeńisi. Biraq oǵan da tym saıası mán ústeýdiń qajet joq dep oılaımyn. Óıtkeni ol eki eldiń arasyndaǵy másele. Qazaqstannyń Eýrazııalyq ekonomıkalyq odaq aıasynda óziniń ustanatyn baǵyttary bar. Bul jerde Qazaqstannyń burynnyn kele jatqan kópvektorly saıasaty bar. Sony da eskergen jón dep oılaımyn», - dep túıindedi sarapshy.
Foto: aqmeshit-zhastary.kz