Túrkistanda «Altyn dombyra-2022» ıegeri anyqtaldy

TÚRKІSTAN. QazAqparat – Túrkistanda aıtysta ótip, «Altyn dombyra-2022» ıegeri anyqtaldy, dep habarlaıdy QazAqparat tilshisi.

Túrkistanda Ahmet Baıtursynulynyń 150 jyldyǵyna oraı uıymdastyrylǵan respýblıkalyq aqyndar aıtysy aıaqtaldy. Eki kúnge sozylǵan jyr alamanyna qatysqan 18 aqynnyń barlyǵy da osal emes ekendigin kórsetti. Aıtyssúıer qaýymdy óreli óneri, órnekti sózderimen sýsyndatty. Arasynda ádemi ázil men jarasymdy qaljyń da aıtyldy.

Aqyndardyń ónerine kórnekti óner qaıratkeri, Qazaqstan jáne KSRO Halyq artısi, Memlekettik syılyqtyń ıegeri Asanáli Áshimov bastaǵan qazylar alqasy baǵa berdi. Sondaı-aq, qazylar quramynda aqyn, halyqaralyq «Alash» ádebı syılyǵynyń ıegeri Ǵalym Jaılybaı, QR Prezıdentiniń ádebıet salasyndaǵy stıpendııasynyń ıegeri, aqyn Svetqalı Nurjan, Parlament Májilisiniń depýtaty, aqyn Janarbek Áshimjan, halyqaralyq «Alash» syılyǵynyń laýreaty, aqyn Dáýletkereı Kápuly, Qadyr Myrza Álı atyndaǵy «Mádenıet jáne óner» ortalyǵynyń dırektory, aqyn Baýyrjan Qalıolla, aıtysker aqyn, QR Mádenıet qaıratkeri Bekarys Shoıbekov boldy.

Aıtystyń qorytyndysynda ádil qazylar sheshimimen Erkebulan Qaınazarov «Altyn dombyra» syılyǵynyń ıegeri atandy. Sondaı-aq, 3 mln teńgege ıe boldy.

Rústem Qaıyrtaıuly júldeli І oryndy, Birjan Baıtýov pen Shuǵaıyp Sezimhan ІІ oryndy (1 mln), Talǵat Myqı men Hazret Berdihan jáne Móldir Aıtbaıqyzy ІІІ oryndy (750 myń) ıelendi. «Altyn dombyranyń» 500 myń teńgelik arnaıy júldesi Nurlan Esenqulovqa, Arǵynbek Qalbaevqa, Qalıjan Bildáshqa buıyrdy. Ózge de aıtysqa qatysýshy aqyndarǵa 300 myń teńgeden tabystaldy.

Aıta keteıik, keshe Túrkistanda «Altyn dombyra» respýblıkalyq aıtysy bastalǵan bolatyn. Mádenıet jáne sport mınıstrligi men «AMANAT» partııasy birlese uıymdastyrǵan aıtysqa 18 aqyn qatysty.