Túrkistanda áleýmettik kómek alatyndardyń qatary jańa sanatpen tolyqty
Óńirlik kommýnıkatsııalar qyzmetinde ótken brıfıngte oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva asa muqtaj azamattar qataryna kópbalaly otbasylar, jumyssyzdar, múgedekter, áleýmettik az qamtylǵan otbasylar kiretinin atap ótti.
«Ataýly áleýmettik kómek alýshylar qataryna 6 jastan 18 jasqa deıingi balalar, 16 jasqa deıingi múgedek balalar, barlyq jastaǵy birinshi, ekinshi jáne úshinshi toptaǵy múgedekter, múgedek balany tárbıeleýshi tulǵalar jáne jergilikti organda tirkelgen jumyssyzdar jatady. Boljam boıynsha oblysta azyq-túlik-turmystyq jıyntyǵymen 174,2 myń adam qamtylatyny kózdelip, 3 aıǵa respýblıkalyq bıýdjetten 2,9 mlrd teńgege 5567 teńge bolatyn azyq-túlik turmystyq jıyntyqtarmen qamtylatyn bolady», – dedi Ásııa Temirbaeva.
Óńirde 6 jastan 18 jasqa deıingi 43190 balaǵa 721,3 mln teńge, 94222 barlyq jastaǵy birinshi, ekinshi jáne úshinshi toptaǵy múgedekter men 16 jasqa deıingi múgedek balalarǵa 1573,6 mln teńge, 23795 jumyssyz azamat 397,4 mln teńge, múgedek balany kútýmen aınalysatyn 13013 adamǵa 217,3 mln teńge qaralǵan. Qazirgi tańda júrgizilgen esepterge sáıkes atalǵan azamattarǵa qarajatyn aýdarý arqyly áleýmettik kómek kórsetý jumystary bastalmaq.
Aıta keteıik, aǵymdaǵy jyldyń 1 toqsanynyń qorytyndysy boıynsha, 1-6 jas aralyǵyndaǵy 25 125 balaǵa 319,2 mln teńge azyq-túlik jáne gıgıenalyq toptamasy berilgen. Jalpy oblys boıynsha ataýly áleýmettik kómek alýshylardyń sany 19,8 myń otbasy nemese 111,9 myń adamdy quraǵan. Olarǵa 2,3 mlrd teńgeniń kómegi tólenip, áleýmettik kómek alýshylardyń 41 paıyzyn kópbalaly otbasylar quraǵan.