Túrkistanda áleýmettik kodekstiń tujyrymdamasy talqylandy

NUR-SULTAN. QazAqparat - Memleket basshysynyń «Jańa jaǵdaıdaǵy Qazaqstan: is-qımyl kezeńi» Qazaqstan halqyna Joldaýyn júzege asyrýǵa baǵyttalǵan Jalpyulttyq is-sharalar josparyn iske asyrý maqsatynda QR Eńbek jáne halyqty áleýmettik qorǵaý mınstrligimen halyqty áleýmettik qorǵaý salasyn retteıtin zańnamalyq aktilerdi júıelendirip, biriktirip Áleýmettik kodeksiniń (Áleýmettik qamsyzdandyrý Kodeksi) tujyrymdamasyn ázirleý boıynsha jumystar júrgizilýde.

Arnaıy jumys toby Túrkistan qalasynda uıymdastyrýshylyq jınalys ótkizdi. Oǵan QR Eńbek jáne halyqty áleýmettik qorǵaý mınıstrliginiń jaýapty qyzmetkerleri jumys jáne saraptama tobynyń músheleri, Túrkistan oblysy ákiminiń orynbasary U.Tájibaev, oblystyq «Nur Otan» partııasynyń ókilderi, oblystyq jumyspen qamtýdy úılestirý jáne áleýmettik baǵdarlamalar basqarmasy, aýdan, qala ákimderiniń orynbasarlary, arnaýly áleýmettik qyzmetter kórsetý ortalyqtarynyń dırektorlary, úkimettik emes uıymdar jáne BAQ ókilderi qatysty.

- Túrkistan oblysynda 94 myńnan astam múmkindigi shekteýli azamattar, 50 myńnan astam kópbalaly analar men 770 myńnan astam zeınetker turady. Bul kórsetkishter boıynsha oblysymyz elimizde 20-25 paıyzyn quraıdy. Arnaıy jumys tobynyń osynda kelip, jańa áleýmettik kodeks boıynsha túsindirý jumystaryn júrgizýiniń ózi oblystyń mańyzdy aımaqtar qatarynda ekendigin bildiredi. Bul turǵyda tájirıbemiz bar. Jáne, aldaǵy ýaqytta halyqtyń jaǵdaıyn jaqsartý úshin jumys jasaıtyn bolamyz, - dedi oblys ákiminiń orynbasary Ulan Tájibaev.

Qatysýshylar aldynda «Qazaqstan Respýblıkasynyń Áleýmettik kodeksi – qazirgi Qazaqstannyń quqyqtyq jańalyqtarynyń biri» taqyrybynda Áleýmettik kodeksti ázirleý tobynyń aǵa sarapshysy Jumahan Júkenov tujyrymdamamen tanystyryp, usynystar men pikirlerdi joldaıtyn áleýmettik jelilerdegi paraqshalardy usyndy.

Keńes barysynda kodeks boıynsha múddeli talqylaý jáne pikir almasýlar bolyp, naqty usynystar aıtyldy. Jınalysqa qatysýshylar aldaǵy ýaqytta daıyndalatyn Áleýmettik kodekstiń jobasyn qosymsha talqylaý qajettigin bir aýyzdan qoldady.