Túrkistanda álemniń 19 elinen kelgen redaktorlar bas qosty

ShYMKENT. QazAqparat - Túrkistanda túrki álemi ádebı jýrnaldary redaktorlarynyń VІІІ kongresi bastaldy. Ońtústik Qazaqstan oblysy ákimdiginiń uıymdastyrýymen jáne TÚRKSOI halyqaralyq uıymy men Eýrazııa Jazýshylar odaǵynyń qoldaýymen ótip jatqan basqosýǵa 19 elden 30-ge jýyq redaktorlar men jazýshylar, kórnekti mádenıet qaıratkerleri qatysýda, dep habarlaıdy QazAqparat HAA tilshisi.

Elbasy Nursultan Nazarbaevtyń  «Bolashaqqa baǵdar: rýhanı jańǵyrý» atty maqalasynyń aıasynda  uıymdastyrylyp jatqan kongress Q.A.ıAsaýı atyndaǵy HQTÝ Mádenıet ortalyǵynda ótýde. Sharanyń maqsaty - túrki halyqtarynyń ádebı baılanystaryn damytý arqyly ulttyq tilderdegi qazirgi zamanǵy aqparat almasýyn jetildirý, ádebıet salasyndaǵy úzdik týyndylardy, ozyq qalamgerlerdi anyqtaý bolyp otyr.

«Túrkistan - túrki mádenıetiniń astanasy» mádenı jobasynyń aıasynda ótkiziletin kongress jumysyna Ońtústik Qazaqstan oblysy ákiminiń orynbasary Ulasbek Sádibekov, TÚRKSOI halyqaralyq uıymynyń Bas hatshysynyń orynbasary Fyrat Pýrtash, Eýrazııa Jazýshylar Odaǵynyń tóraǵasy ıAkýb Omerogly, Qazaqstan Jazýshylar odaǵynyń hatshysy, «Juldyz» jýrnalynyń bas redaktory, Memlekettik syılyqtyń ıegeri, aqyn  Ulyqbek Esdáýlet jáne t.b. ádebıet jáne mádenıet qaıratkerleri qatysyp, sóz sóıleýde.

Eki kúnge sozylatyn shara baǵdarlamasy boıynsha «2016 jylǵy Túrki álemindegi  jyl ádebıetshisi» syılyǵyn tapsyrý rásimi ótkizilip, 2017 jyldyń úzdik ádebıetshisi anyqtalatyn bolady. Túrki álemi ádebı jýrnaldary redaktorlarynyń VІІІ kongresinde túrki tildes halyqtardyń búgingi ádebı ómirindegi ádebı jýrnaldardyń qyzmeti sarapqa salynyp, «Túrki álemi ádebıetindegi zamanaýı shyǵarmashylyq úrdis jáne ádebı jýrnaldar» taqyrybynda semınar ótkiziledi dep kútilýde.