Túrkistanda Ál-Farabı týraly anımatsııalyq fılmniń tanystyrylymy ótti
Fılmdi Túrkistan oblysy ákimdiginiń tapsyrysymen «Ońtústikfılm» KMM-si men «SAQ» kınostýdııasy túsirgen, dep habarlaıdy Ońtústik Qazaqstan oblysy ákiminiń baspasóz qyzmeti.
Bul fılmde álemge áıgili ǵulama Ál-Farabıdiń balalyq shaǵy, bilimge degen alǵashqy qadamy, jańashyldyqqa degen umtylysy sıpattalady. Bilimin el ıgiligine jumsaǵan ǵulamanyń óz eline degen súıispenshiligi, Otanǵa qyzmet etýdegi qaıratkerligi sýrettelgen.
Tarıhı derekterge súıensek, Ál-Farabı qazirgi Otyrar aýdany aýmaǵyndaǵy Oqsyz qalashyǵynda dúnıege kelgen. Sondyqtan fılmniń aty da «Oqsyz oqıǵasy» dep qoılyǵan. 3D formatta ázirlengen fılmniń uzaqtyǵy - 25 mınýt. Rejısseri - Nýrıddın Patteev, stsenarıin jazǵan Baqytjan Quljabaı, kompozıtory Áıteke Kóptileý, qoıýshy sýretshisi Samat Nuralıev.
Anımatsııalyq fılmdi túsirýdegi maqsat - jas urpaqty otansúıgishtikke baýlyp, adal ári bilimdi bolýǵa shaqyrý. Uly tulǵalarǵa, tarıhqa degen qurmetti oıatý.
Túrkistan oblysy ákimdigi uıymdastyrǵan jıynda «Rýhanı jańǵyrý» jobalyq keńsesiniń jetekshisi Baqytjan Áshirbekov atqarylǵan jumystar jóninde baıandady.
Onyń aıtýynsha, Túrkistan oblysy «Rýhanı jańǵyrý» baǵdarlamasy aıasynda ult rýhanııatyna oń serpin beretin is-sharalar boıynsha kóshbasshylar qatarynda. Sonymen birge Elbasynyń «Uly dalanyń jeti qyry» baǵdarlamalyq maqalasyndaǵy mindetterdi oryndaý baǵytynda da jumystar qolǵa alynǵan.
«Rýhanı jańǵyrý» baǵdarlamasynyń 2 jyldyǵyna arnalyp ótkizilgen basqosýda Túrkistan oblystyq mádenıet jáne tilderdi damytý basqarmasynyń bólim basshysy Ǵalııa Sharafıeva jastarǵa, jalpy azamattarǵa patrıottyq tárbıe beretin jobalarǵa árdaıym qoldaý kórsetiletinin jetkizdi. Fılm rejısseri Nýrıddın Patteev te osy baǵyttaǵy fılmderdi túsirý jumystary jalǵasatynyn aıtty.
Aıta keteıik, «SAQ» kınostýdııasy ótken jyly oblys ákimdiginiń tikeleı qoldaýymen «Kúsh atasy - Qajymuqan», «Otyrardy qorǵaý», «Kıeli Qazyǵurt» anımatsııalyq fılmderin jáne «Kóne jetigenniń syry» atty 10 serııaly telehıkaıa men «Uly Jibek Joly boıyndaǵy kóne qalalar» derekti fılmin, «Ordabasy - birliktiń týy» fılmderin jurtshylyqqa usyndy.
Jaqynda «Túrkistan» anımatsııalyq fılmi men «Tóle bı» atty 10 serııaly kınohıkaıa da kórermenge jol tartady.