Túrkistanda ákimder men memqyzmetshiler jumysqa ulttyq kıim kıip keldi

TÚRKІSTAN. QazAqparat - Túrkistan oblysynda Naýryz merekesi 10 kún boıy eldiń eńsesin kóteretin ıgi is-sharalarmen órnektelip jatyr. Búgin, 15 naýryzǵa «Naýryz – ulttyq dástúr men meımandostyq merekesi» degen aıdar taǵylyp, barlyq aýdan-qalada ákimdikter men memlekettik mekeme qyzmetkerleri jumysqa qazaqtyń ulttyq kıimin kıip keldi, dep habarlaıdy QazAqparat.

Ulttyq bolmysymyzdy, mádenıetimiz ben kıimimizdi dáripteýge arnalǵan bastamany Túrkistan oblysynyń ákimi Darhan Satybaldy bastap berdi.

Áriptesterin kele jatqan Naýryz merekesimen quttyqtaǵan óńir basshysy oblys ákimi apparatynyń kezekti otyrysyn ótkizdi.

– Sizderdi ulttyq kıimde kórip kóńilim kóterilip ketti. Ulttyq kıim memlekettik qyzmetshiniń bolmysyn erekshe etip kórsetedi. Mádenıetimiz ben dástúrimizdi qoldaǵan jón. Naýryz jaqsylyǵymen kelip, halqymyzdyń berekesi arta bersin, – degen Darhan Satybaldy kún tártibindegi máselelerdi talqylap, tapsyrma berdi.

Oblystyq basqarma basshylary men qyzmetkerleri, aýdan, qala ákimderi men ákimdik ujymdary da jumysqa ulttyq kıimmen kelip, bastamaǵa qoldaý kórsetti.

Túrkistan óńiriniń memlekettik qyzmetshileri aldaǵy ýaqytta da ulttyq kıim kııýdi dástúrge aınaldyrýdy kózdep otyr.