Túrkistanda «Adaldyq elshileri» jobasynyń belsendi jastarymen kezdesý ótti

TÚRKІSTAN. QazAqparat – Túrkistanda «Adaldyq elshileri» jobasynyń  belsendi jastarymen ashyq kezdesý ótti. Oblystyq jastar resýrstyq ortalyǵynda ótken keleli basqosýdy QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti uıymdastyrdy, dep habarlaıdy QazAqparat tilshisi.

Shara barysynda «Túrkistan – adaldyq alańy» jobalyq keńsesiniń jetekshi mamany Aqtóre Talǵatuly jumys barysyn keńirek baıandap, turmystyq jemqorlyqty joıýǵa baǵyttalǵan sharalardyń qoǵam dertiniń aldyn alýda aıryqsha mańyzǵa ıe ekendigin jetkizdi. Sonymen birge, sybaılas jemqorlyqpen qarqyndy kúres júrgizý boıynsha atqarylatyn aýqymdy jumystardy jiti túsindirip, erikti jastardy birige jumys isteýge shaqyrdy.

Kezdesýde el jastary áleýmettik indetti joıýǵa baǵyttalǵan kreatıvti usynystaryn ortaǵa salyp, pikir almasty. Aldaǵy ýaqyttaǵy jumystardyń ózektiligin talqyǵa saldy.

Aıta keteıik, «Adaldyq elshileri» bıylǵy sáýir aıynda «Túrkistan – adaldyq alańy» jobalyq keńsesi aıasynda oblysqa qarasty barlyq qala, aýdandardyń erikti jastarynan qurylǵan bolatyn.

Adaldyq qundylyǵyn qalyptastyrýǵa baǵyttalǵan kezdesýdiń maqsaty – qoǵamda ashyqtyq pen ádildikti nasıhattaýdyń úzdik joldaryn qarastyrý, jobalyq keńseniń jumysyn belgilengen mejemen júrgizý boıynsha birqatar usynys, pikirler almasý jáne atalmysh joba múshelerine jyl sońyna deıin qala, aýdandarda atqaratyn jumys josparyn tanystyrý boldy.