Túrkistanda «Adal urpaq» eriktiler klýbynyń oblystyq sleti ótti

TÚRKІSTAN. QazAqparat – Túrkistanda «Adal urpaq» eriktiler klýbtarynyń oblystyq sleti ótti. Basqosýdy QR Sybaılas jemqorlyqqa qarsy is-qımyl agenttiginiń Túrkistan oblysy boıynsha Departamenti men Oblystyq adamı áleýetti damytý basqarmasy birlesip uıymdastyrdy, dep habarlaıdy QazAqparat tilshisi.

Jıynǵa Departamenttiń Preventsııa basqarmasynyń basshysy Ǵ.Júndibaev pen oblystyq adamı áleýetti damytý basqarmasynyń basshysy R.Jolaev jáne barlyq qala-aýdannan kelgen myńǵa jýyq oqýshy qatysty. «Eldiń erteńi bolashaq urpaǵymyzdy kishkentaıynan Otan súıgishtikke, adamdardy jáne dástúrlerdi qurmetteýge, bilim men eńbekke umtylýǵa, kóregendilik pen adaldyqqa tárbıeleý paryzymyz. Bul — bizdiń halqymyzda ejelden bar uly qasıet. Sondyqtan ár ata-ana, árbir ustaz balalar úshin laıyqty úlgi bolýǵa, naǵyz qasterli qasıetterdi tańdaýǵa kómektesýi qajet»,- dedi Preventsııa basqarmasynyń basshysy Ǵ.Júndibaev. Sondaı-aq, Ǵ.Júndibaev adamı áleýetti damytý basqarmasymen birlesip uıymdastyryp otyrǵan oblystyq Sletta barlyq ustazdarǵa oqýshylardyń boıyna adaldyq pen rýhanı baılyqty darytýda qosyp júrgen eńbekteri úshin Alǵys bildirip, balalarǵa adaldyq pen meıirimdilik jáne jaýapkershilik qasıetterin qalyptastyrýda ata-analary men ustazdarynan tıisti úlgi alý kerektigin, sabaqtaryn jaqsy oqýǵa, tártibi jaqsy ozat oqýshy bolýǵa shaqyrdy. Іs-shara barysynda óńirdegi «Adal Urpaq» erikti mektep klýbtarynyń arasynda sherý men fleshmob, qol ónershiler kórmesi men shahmat oıyndary, sýret salý jáne beınerolık konkýrstarynyń jeńimpazdary marapattaldy. Olarǵa syılyqtar men alǵys hattar tapsyryldy. Aıta keteıik, búgingi kúni oblystaǵy mektepterde sybaılas jemqorlyqqa tózbeýshilikti kórsetetin qundylyqtar júıesin saqtaýdaǵy tárbıe jumystaryn uıymdastyrýǵa járdemdesetin 903 «Adal Urpaq» erikti mektep klýbtary qurylyp, onda 300 myńnan asa jas órender múshelik etedi.