Túrkistanda Abaıdyń 175 jyldyǵyna oraı anımatsııalyq fılmder túsiriledi
Túrkistan oblysy búginde teleserıal men anımatsııalyq fılmderdiń ortalyǵyna aınalyp otyr. Buǵan deıin ańyz ári tarıhı keıipkerlerdi pash etetin birneshe týyndyny kórermenge tartý etti.
Bıyl da Ál-Farabıdiń 1150 jyldyǵyna oraı «Túrkistan qupııalary» derekti fılmin jáne Abaıdyń 175 jyldyǵy aıasynda anımatsııalyq fılmderdi túsirý josparlanyp otyr. Bul týraly Óńirlik kommýnıkatsııalar qyzmetinde ótken brıfıngte oblystyq Mádenıet basqarmasy basshysynyń mindetin atqarýshy Ázimhan Qoılybaev málimdedi.
Aıta keterligi, oblysta túsirilgen «Kúsh atasy − Qajymuqan», «Kıeli Qazyǵurt», «Otyrardy qorǵaý» anımatsııalyq fılmderi men «Kóne jetigenniń syry» teleserıaly oblystyń barlyq aýdandary men qalalarynda jáne jergilikti telearnalar men «Habar», «Asyl arna» telearnalarynan kórsetilgen bolatyn.
Búgingi tańda oblysta 679 mádenıet jáne óner mekemesi halyqqa qyzmet kórsetedi. Onyń ishinde: 389 kitaphana, 251 klýb, 24 murajaı, 3 kásibı teatr, 6 saıabaq, 2 ortalyq, 1 oblystyq fılarmonııa, 1 kórkemsýret galereıasy,1 «Ońtústikfılm» mekemesi bar.
«Ótken jyly oblystyq kásibı 3 teatrda 10 jańa qoıylym sahnalandy. Aǵymdaǵy jyly atalǵan teatrlarda 702 qoıylym halyqqa usynylyp, 22 gastroldik issapar uıymdastyryldy. Teatrlarda Ál-Farabıdiń 1150, Abaıdyń 175 jyldyq mereıtoıyna oraı jańa spektaklderiniń premerasy halyq nazaryna usynylmaq. Atalǵan mereıtoılarǵa baılanysty sáýir aıynda «Teatr kóktemi-2020» kásibı teatrlardyń festıvali men «Halyqtyq» ataǵy bar teatrlardyń baıqaýy ótedi. Sonymen qatar, Otyrar aýdanynda «Open air» ashyq aspan astyndaǵy teatry iske qosylyp, tarıhı kórkem, anımatsııalyq fılmder kórsetilip, qarasha aıyna deıin halyqqa qyzmet kórsetetin bolady», - dedi basqarma basshysy.
Sondaı-aq, oblystaǵy 389 kitaphanada 17 125 kópshilik is-shara uıymdastyrylǵan. Kitaphanalar 110 641 dana jańa kitappen tolyqtyrylyp, Jalpy kitap qory 5 mln 768 myń danadan asyp otyr. «Eń kóp oqylatyn 100 kitap», «Altyn qorǵa úles qos», «Kitaphanaǵa syı» aktsııalary uıymdastyrylyp 13 043 dana kitap kitaphanalardyń qoryna syıǵa berilgen.
Budan ózge, bıyl atalyp ótkeli otyrǵan kompozıtor Sh.Qaldaıaqovtyń 90 jyldyǵyna oraı «Baqyt qushaǵynda» atty retro-festıvali, «Án erkesi» merekelik kontserti, «Meniń Qazaqstanym» oblystyq án baıqaýy jáne barlyq aýdan, qalalarda 80-ge jýyq is-shara ótkizý josparlanýda.