Túrkistanda 30-dan astam kóshe keńeıtilip, kúrdeli jóndeýden ótip jatyr

TÚRKІSTAN. QazAqparat - Túrkistan qalasynda kólik keptelisiniń aldyn alý maqsatynda keı kósheler keńeıtilip, taǵy birazy kúrdeli jóndeýden ótýde. Osylaısha bıyl qaladaǵy 30-dan astam kóshe jóndeledi dep josparlanǵan, dep habarlaıdy QazAqparat tilshisi.

Máselen, uzyndyǵy 4 shaqyrymǵa jýyqtaıtyn Shekti tileý, Jibek joly kóshelerine eni 20 metrden asatyn qos jolaq jol salynýda. Bul jumystarǵa memleket qazynasynan qajetti qarajat bólinip, 60-tan astam jumysshy men 16 tehnıka jumyldyrylǵan. Qurylysty júrgizip jatqan merdiger mekeme basshylyǵy jol salý tehnologııasynyń talaptaryn qatań ustanyp jatqanyn aıtady. Aldymen jerdiń eń bos qabaty taptalyp, keıin birneshe qabat qıyrshyq tas tastalýda. Qurylysyna qyrýar qarjy jumsalǵan jolǵa eki qabat asfalt tóseledi. Jol qurylysy aıaqtalǵannan keıin merdigerler bes jylǵa kepildik beremiz dep otyr. Aıtýlarynsha, asfalttyń qalyńdyǵy 18 santımetr bolady.

Mundaı aýqymdy jumystar qazir Túrkistandaǵy Maıkotov kóshesinde de júrgizilýde. Onda da kóshe keńeıtilip, asfalttalyp jatyr. Qurylys jumystary osy jyly aıaqtalady dep josparlanǵan.

«Negizgi jumystar kún jylynǵan soń naýryz, sáýir aılarynda bastalady. Joldardy retteý úshin oblystyq bıýdjetten 2,5 mlrd teńge bólingen. Al, jergilikti bıýdjetten 600 mln teńgeden astam qarjy qaraldy. Jol jóndeý jumystary qyrkúıek, qazan aıyna deıin jalǵasady»,-deıdi Túrkistan qalalyq jolaýshylar kóligi jáne avtomobıl joldary bóliminiń basshysy Baıdýlla Orazbekov.

Aıta keteıik, búginde oblys ortalyǵyna aınalǵan Túrkistan qalasynda kólik nópiri kóbeıgen. Sonyń saldarynan birqatar kóshelerde keptelister oryn alýda.