Túrkistanda 2500 myń tonna halal jelatın óndirilmek

TÚRKІSTAN. QazAqparat – Túrkistan oblysynyń ákimi Ómirzaq Shókeev malaızııalyq PNMB International bas dırektory Ahmad Sıazalımen kezdesti. Álemdegi jelatın óndirisiniń bastamashysy bolyp tabylatyn kompanııa oblys aýmaǵynda 35 mıllıon AQSh dollarynyń (15,5 mıllıard teńge) «KazGelatine» ınvestıtsııalyq jobasyn iske asyrmaq, dep habarlaıdy QazAqparat tilshisi.

«Halal» standartyna sáıkes jumys isteıtin kompanııanyń ónimi Arab elderinde úlken suranysqa ıe. Malaızııalyq kompanııa jylyna 2500 tonna jelatın úgindisin shyǵaratyn, 750 myń iri qara men jylqynyń terisin óńdeıtin óndiris bastamashysy sanalady. Óńirde júzege asyrylatyn jobanyń quny 35 mıllıon AQSh dollaryn (15,5 mıllıard teńge) quraıdy. Óndiris orny azyq-túlik qaýipsizdigi jónindegi ıslam uıymy (IOFS) kelisimine sáıkes jumys isteıdi. Indýstrıaldy aımaqtyń ınvestoryna aýmaǵy 8 ga jer beriledi. Óndiris iske qosylǵanda 70 turaqty jumys orny ashylmaq. Taýardy Qazaqstan, Ózbekstan, BAÁ, Saýd Arabııasy men Úndistan elderine eksporttaý kózdelgen.

«Men jobańyzdy bizdiń oblysta júzege asyrýǵa nıet bildirgenińiz úshin rızashylyǵymdy bildirgim keledi. Ákimdik atynan sizderdiń kásipterińizdi sátti iske qosý úshin bar kúsh - jigerimizdi salamyz. Bilýimshe, sizdiń óndirisińiz eldegi halal jelatınine degen suranysty tolyqtaı jaba alady jáne eń bastysy, bul Ortalyq Azııadaǵy jalǵyz túri bolady», - dedi oblys ákimi.

Aıta ketý kerek, mańyzdy amınqyshqyldarynyń kóp mólsherin qamtıtyn tabıǵı aqýyz kózi óndirisiniń álemdik ındýstrııasynda tek 2% - y halal. Sondaı-aq, iske qosylatyn óndiris jelatındi óndirýden bastap, ony keıinnen qaıta óńdeýmen, saýdaǵa jáne basqa kásiporyndarǵa jiberý úshin oraýmen tolyq tsıkldy iske asyratyn keshen bolmaq. Tamaq ónerkásibinen basqa salalarda da ónimdi taratý josparda bar. Qazaqstan naryǵynda jelatın óndirisi kenje qalǵan. Al, jelatındi eksporttaýshylar - Belarýs, Reseı, Italııa, Qytaı jáne Belgııa memleketteri.