Túrkistanda 2 tonna palaý men baýyrsaq tegin taratyldy
Festıval aıasynda aýyl sharýashylyǵy salasynda belsendilik tanytyp, úzdik kórsetkishke qol jetkizgen qala-aýdandar jáne jeke sharýalar QR Premer-Mınıstrdiń orynbasary aýyl sharýashylyǵy mınıstri Ómirzaq Shókeev pen oblys ákiminiń medaldaryna ıe boldy. Jeńimpazdarǵa arnaıy sertıfıkattar tabys etildi. Óńir sharýalary «Ozat astyq jınaýshy», «Ozat mal bordaqylaýshy», «Ozat baqsha ósirýshi» syndy 21 nomınatsııa boıynsha marapattaldy. Sondaı-aq, shara barysynda kórme uıymdastyrylyp, onda aýyl sharýashylyǵy ónimderi, asyl tuqymdy tórt túlik maldyń túrleri men ozyq tehnıkalar qoıyldy. Budan bólek, alańda aýyl sharýashylyǵy ónimderiniń jármeńkesi ótip, onda 182 tonna tabıǵı taza ónimder naryqtaǵy baǵadan 15-20 paıyzǵa arzan baǵada saýdalandy. Qonaqtar úshin 1 tonna palaý men 1 tonna baýyrsaq daıyndalyp, kópshilikke tegin taratyldy.
Merekelik jıynda oblys ákimi Janseıit Túımebaev sala mamandaryn kásibı merkelerimen quttyqtap, aımaqtyń jetistikterine toqtaldy
«Óńirdegi aýyl sharýashylyq salasynyń jalpy ónim kólemi 475,6 mlrd teńgege jetip, respýblıkada 2-shi orynǵa qol jetkizdik. Kókónis, baqsha daqyldarynan 2,8 mln tonnamen rekordtyq ónim jınadyq. 500 myń tonnaǵa jýyq ónimder Reseı, Belarýs, Latvııa, Germanııa memleketterine, 1 mln tonnasy elimizdiń soltústik óńirlerine jóneltildi. Qarqyndy baýlardyń kólemi 2800 gektarǵa jetip, eldegi jemis-jıdektiń 40 paıyzy, júzimniń 73 paıyzy amaqta óndirildi. Respýblıkadaǵy salynǵan jylyjaılardyń 77 paıyzy, tamshylatyp sýǵarý ádisiniń 73 paıyzy da bizdiń óńirge tıesili. Oblysta alǵash ret 6,2 myń tonna et eksporttalyp, respýblıka eksportynyń 41 paıyzyn qamtydy. Munyń barlyǵy Sizderdiń etken eńbek, tókken termen kelgen jetistikter dep aıtýǵa tolyq negiz bar», - dedi Janseıit Túımebaev.