Túrkistanda 10 myń oryndyq záýlim meshit pen Islam ortalyǵy ashyldy

TÚRKІSTAN. QazAqparat – Túrkistan oblysynyń Saryaǵash aýdanynda sáýleti erekshe meshit pen Islam ortalyǵy ashyldy. Dinı ortalyqtyń ashylý rásimine jer-jerden 10 myńǵa jýyq halyq jınaldy, dep habarlaıdy QazAqparat tilshisi.

Qulshylyq úıiniń ashylý saltanatyna Túrkııadan kelgen mártebeli meıman Nejmettın Erdoǵan Bilál men Sheshenstan Respýblıkasy basshysynyń keńesshisi Amrýddın Edılgerev, Túrkistan oblysynyń ákimi Ómirzaq Shókeev pen Qazaqstan Musylmandary dinı basqarmasynyń tóraǵasy, Bas múftı Serikbaı qajy Oraz, Ózbekstan múftıi Osmanhan qajy Álimov pen Qyrǵyzstan múftıi Maqsatbek qajy Toqtamýshov, Qazaqstannyń burynǵy múftı Erjan qajy Malǵajyuly men birinshi naıb múftı, Nur-Sultan qalasynyń bas ımamy Naýryzbaı qajy Taǵanuly, naıb múftı Ershat qajy Aǵybaıuly men QMDB Apparat basshysy Ǵylymbek Májıev, ózge de din qaıratkerleri men zııaly qaýym ókilderi jáne jamaǵat qatysty. Quran aıatymen ashylǵan saltanatty sharada sóz alǵan Bas múftı Serikbaı qajy Oraz árbir adam ómirinde meshittiń alar orny týraly nasıhat aıtty.

«Biz tasymyzdy túrtip qalsań, tarıh tunǵan kıeli baıtaq jerdiń ıesimiz. Osynaý kıeli keń dalada meshit salyp, rýhanı qundylyqtarymyzdy nasıhattap kelemiz. Osynyń bári Allanyń qalaýymen táýelsizdigimizdiń arqasynda júzege asýda. Ǵulamalar: »Meshit – ómir ishinde, ómir – meshit ishinde«, - degen. Demek, meshit pen ómir – egiz uǵym. Bizdiń ómirimiz meshitpen baılanysty. Adamnyń júregi qulshylyq úıinde jaı tabady. Onda qanshama ýaqytymyzdy qulshylyqpen ótkizemiz. Baýyrdy bir-birimen qaýyshtyryp, ózara ımandasatyn mekenimiz – meshit. Eldiń ıgiligi úshin jasalatyn qaıyrymdylyq pen izgi ister de Allanyń úıinde júzege asady. Jabyrqaǵan jannyń meıirimge bólenetin mekeni de – meshit. Sábı dúnıege kelgen sátte oǵan azan shaqyrylyp, at qoıylady. Ol meshitte tálim alyp, er jetkende nekesi qıylady. Otbasylyq ómirde kezdesetin túrli synaqtar men saýaldardyń jaýaby hám pátýasy osy meshit pen ımamnyń aralasýymen júzege asady. Sondyqtan, meshit salý - saýaby mol saýapty is», – dedi Serikbaı qajy Oraz.

Bas múftı shetelden kelgen qonaqtarǵa alǵys aıtyp, meshitti salyp bergen azamattarǵa erekshe iltıpaty men jyly lebizin bildirdi.

Aıta ketsek, Satybaldy Ábishuly atyndaǵy Islam ortalyǵynda bir mezette 10 myń adam qulshylyq ete alady. Meshit ishinde medrese-kolledj shákirtterine arnalǵan 29 synyp bar. Ortalyqta 600 bala dáris tyńdaı alady. 69 jatyn oryndy qamtyǵan ortalyqta 1000 adamǵa arnalǵan ashana salynǵan.