Túrkistanda 1 naýryzdan bastap 50-den astam kamera iske qosylady
Túrkistan oblysy Polıtsııa departamenti Ákimshilik polıtsııa basqarmasynyń bastyǵy, polıtsııa polkovnıgi Almashan Tastanbekovtyń aıtýynsha, Túrkistan qalasyna 30 jyldamdyq ólshegish jáne 26 kóshe qıylysyna «Sergek» qurylǵysy ornatylǵan.
Atap aıtqanda, beınekameralar Túrkistan qalasyndaǵy Taýke-han, B.Sattarhanov dańǵyldary men Qyzylorda, Kentaý, Qarnaq, Baltakól, Shymkent tas joldarynynyń boıynda jol erejesin qadaǵalaıdy. Sondaı-aq Jibek Joly, S.Erýbaev, B.Maılın, Maıkotov, Samara M32 Shymkent, S.Qojanov, Qaradaýov, Qazybek bı, Jarylqapov, Altynsarın, O.Jandosov, Birlik, Shekti Tileý, Ál-farabı, Sandybaı kósheleri qıylystarynda iske qosylady.
«Qazirgi tańda oblys boıynsha 28 zııatkerlik júıeler iske qosylǵan. Onyń shinde 23-i turaqty jáne 5 qurylǵy jyljymaly. Bul zııatkerlik júıeler Túrkistan qalasymen qatar oblys aýmaǵynan ótetin respýblıkalyq jáne oblystyq mańyzy bar joldarǵa ornatylǵan. Atalǵan beınebaqylaý kameralary jol-kólik oqıǵalary bolǵan ýaqytta der kezinde anyqtap, jedel sharalar qoldanýǵa septigin tıgizedi. Sonymen qatar, quqyq buzýshylyqtardy anyqtaýǵa jáne qylmystardy tezirek ashýǵa múmkindik beredi»-dedi A.Tastanbekov.