Túrkistan jurtshylyǵy asharshylyq jáne qýǵyn-súrgin qurbandaryn eske aldy

TÚRKІSTAN. QazAqparat - Búgin Túrkistan qalasynda 31 mamyr - saıası qýǵyn-súrgin jáne asharshylyq qurbandaryn eske alý kúnine arnalǵan is-sharalar ótti. Aldymen Túrkistan qalasyndaǵy joǵary medıtsına kolledjinde ótken jıynda qatysýshylar Sultanbek Qojanovtyń eskertkishine gúl shoqtaryn qoıyp, saıası qýǵyn-súrgin jáne asharshylyq qurbandaryn 1 mınýt únsizdikpen eske aldy, dep habarlaıdy QazAqparat.

Eske alý sharasynda sóz sóılegen Túrkistan oblys ákiminiń orynbasary Málik Otarbaev HH ǵasyrdaǵy asharshylyqta mıllıondaǵan qandasymyz qyrylyp, eldiń qaımaqtary sanalatyn ult qaıratkerleri saıası qýǵyn-súrginge ushyraǵanyn aıtty.

«1930 jyldary A.Baıtursynovtyń jazba dereginde qazaqtyń sany 6 mıllıonnan asqan bolsa, onyń 2 mıllıonnan astamy ashtyqtan qyrylǵan. 2 mıllıonǵa jýyq qandasymyz shetel asyp ketti. Stalın men Goloşekınniń saıasatyna qarsy shyǵyp, qazaqtyń qamyn oılaǵan qaıratkerlerimiz, kóshbasshylarymyz, kózi ashyq azamattarymyz saıası qýǵyn-súrginge ushyrady», - dedi ol.

Sondaı-aq M.Otarbaev qıyn kezeńde ult úshin sheıit bolǵan asyl erlerdi umytpaı, olardyń esimin urpaq sanasyna sińirý kerektigine toqtaldy. Babalarymyz qaldyrǵan uly dalaǵa ıelik etip, amanatqa adal bolý - mindetimiz ekenin aıta kele mundaı zulmat endi qaıtalanbasyn degen tilegin jetkizdi.

«Osy kúni Túrkistandaǵy S.Seıfýllın atyndaǵy №4 mektep lıtseıinde, N.Tórequlov atyndaǵy №8 jalpy orta mektebinde jáne M.Jumabaev atyndaǵy №15 mektep-lıtseıinde de eske alý sharalary ótti. Sonymen qatar R.Seıtmetov atyndaǵy Túrkistan qalasynyń sazdy drama teatrynda D.Isabekovtyń «Óıtpese Maǵjan bola ma?» spektakli kórermen nazaryna usynylsa, mýzeılerde asharshylyq qurbandaryna arnalǵan kórme uıymdastyryldy», - delingen Túrkistan oblysy ákiminiń baspasóz qyzmeti taratqan aqparatta.