Túrkistan jurtshylyǵy Almatyda qaza tapqan jas jaýyngerdi aqtyq saparǵa shyǵaryp saldy
Almaty qalasyndaǵy terrorıstik shabýylǵa toıtarys kezinde QR Ulttyq qaýipsizdik komıteti Shekara qyzmeti akademııasynyń 2 kýrs kýrsanty Dáýlet Juparbekov qaza tapty. El úshin sheıit bolǵan batyrdyń erligi eskerilip, QR Prezıdenti Qasym-Jomart Toqaevtyń Jarlyǵymen ІІІ dárejeli «Aıbyn» ordeni berildi.
Otan aldyndaǵy boryshyna adal bolyp, el tutastyǵyn saqtaý jolynda erlikpen qaza tapqan jas ulannyń denesi óziniń týǵan jeri – Túrkistan oblysy, Saryaǵash aýdanyna jetkizildi. Túrkistan jurtshylyǵy ony aqtyq saparǵa shyǵaryp saldy.
Halyq qaharmany Baqytjan Ertaev bul qaıǵy bir ǵana otbasy emes, halyqtyń qaıǵysy ekenin jetkizdi. Saryaǵash aýdanynyń ákimi Muhıt Otarshıev pen el aǵalary, áskerı sala basshylary men ókilderi, jergilikti turǵyndar marqumnyń otbasyna kóńil aıtty.
«Dáýlet – óz eliniń naǵyz patrıoty, antyna adal, joldastary arasynda syıly, eline áli bereri kóp, bolashaǵynan úlken úmit kúttiretin azamat edi. Orny tolmas aýyr qaıǵylaryńyzǵa ortaqtasyp, shyn júrekten kóńil aıtamyn. El úshin eńbek etken batyr uldyń jarqyn beınesi aýdan halqynyń, aǵaıyn-týys, dos-jaran, áriptesteriniń júreginde máńgi saqtalary sózsiz», – dedi aýdan ákimi.
Dáýlet Juparbekov 2002 jyly 1 jeltoqsanda Saryaǵash qalasynda dúnıege kelgen. Tolybaı batyr atyndaǵy jalpy orta mektebin bitirip, Almaty qalasyndaǵy Ulttyq qaýipsizdik komıteti Shekara qyzmeti akademııasyna oqýǵa túsken bolatyn. Otbasyndaǵy ekinshi perzent. Marqumnyń qalǵan ata-anasy, ápkesi jáne 2 inisi bar.