Túrkistan túrki halyqtarynyń birigýine jol ashady - Barshagúl Isabekova

ShYMKENT. QazAqparat - Elbasy N. Nazarbaevtyń Ońtústik Qazaqstan oblysynyń ataýyn Túrkistan oblysy dep ózgertýi, tıisti Jarlyqqa qol qoıýy shynynda óte mańyzdy oqıǵa bolyp otyr. Bul Ońtústik Qazaqstan pedagogıkalyq ýnıversıtetiniń oqý isi jónindegi prorektory, tarıh ǵylymdarynyń kandıdaty, dotsenti Barshagúl Isabekovanyń pikiri, dep habarlaıdy QazAqparat tilshisi.

Tarıhshynyń sózinshe, oblys ataýynyń Túrkistan oblysy bolyp ózgerýi jáne Túrkistannyń oblys ortalyǵyna aınalýy búkil túrki halyqtarynyń birigýine jol ashady.

«Túrkistan erteden-aq túrki jurtynyń ortalyǵy retinde saıası-ákimshilik turǵydan úlken ról atqarǵan. Shyn máninde rýhty kótergen, Túrkistannyń tarıhı róline qaıta baǵa berilgeni tarıhı sheshim boldy.

Túrkistan - orta ǵasyrlarda qazaq handyǵynyń jáne Túrki halyqtarynyń rýhanı astanasy bolǵandyǵy aıan. 1865 jyly Túrkistan oblysy, 1867-1868 jj. Túrkistan general-gýbernatorlyǵy, 1918-1924 jj. Túrkistan AKSR-i syndy tarıhı ataýdyń qaıta oralýy, ıaǵnı Túrkistan oblysynyń qurylýy tek Ońtústik Qazaqstandyqtardy ǵana emes, búkil túrki halyqtaryn qýantyp, mereılerin ósirdi. Túrkistan qalasy - mádenı, áleýmettik-ekonomıkalyq turǵydan órkendep, ınfraqurylym, týrızm damyp, órkenıet besigine aınalary haq»,- deıdi Barshagúl Isabekova.