Túrkistan turǵyny tyıym salynǵan dinı aǵymdy nasıhattaǵany úshin jazalandy

TÚRKІSTAN. QazAqparat – Túrkistan oblystyq PD ekstremızmge qarsy is-qımyl basqarmasynyń qyzmetkerleri áleýmettik jelilerge destrýktıvti aǵymnyń aýdıojazbasyn taratý deregin anyqtady. Jedel izdestirý sharalaryn júrgizgen tártip saqshylary osy aýdıojazbalardy taratyp júrgen turǵyndy tapqan, dep habarlaıdy QazAqparat tilshisi.

Óńirdiń polıtsııa qyzmetkerleri atalǵan materıaldardy taratyp-jetkizýshi kúdiktini anyqtap, Jetisaı polıtsııa bólimine jetkizdi. Tergeý barysynda onyń destrýktıvti-dinı aǵymdy ustanýshy retinde esepte turatyny anyqtaldy.

Jaýap alý kezinde ol óziniń teris áreketin tolyq moıyndap, atalmysh aýdıojazba derekterin polıtseılerdiń aldynda óshirip tastady. Sebebi, bul dáristerge Aqtóbe oblystyq sotynyń qaýlysymen 2019 jyly tyıym salynǵany belgili boldy.

«Saraptama qorytyndysyna sáıkes, bul materıaldardyń QR zańnamasyna qaıshy keletini anyqtalǵan. Aýdıojazba eldegi Konstıtýtsııalyq qurylymdy kúshtep ózgertip, memlekettiń qaýipsizdigine nuqsan keltirýge baǵyttalǵan. Sondaı-aq, soǵysty jáne arazdyqty nasıhattaıtyny aıqyndalǵan. Sot sheshimimen er adam QR ÁQBtK 453-babynyń 2-bóligimen kináli dep tanylyp, 20 AEK aıyppul túrinde ákimshilik jaýapkershilikke tartyldy» delingen habarlamada.