Túrkistan turǵyndaryna Ramazan aıynda aýyzashar ótkizýge bolmaıtyny eskertildi

TÚRKІSTAN. QazAqparat – Túrkistan oblysynda Ramazan aıynda aýyzashar ótkizilmeıdi jáne meshitterde taraýıh namazy oqylmaıdy. Elde jarııalanǵan tótenshe jaǵdaı kezinde dinı joralǵylar jasaýdyń jańa úlgisin Qazaqstan musylmandary dinı basqarmasynyń Túrkistan oblysy boıynsha bas ımamy Musabek Aqtamberdi aıtyp ótti, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken brıfıngte bas ımam, sondaı-aq dinı merekege daıyndyq barysy men jalpy oblystaǵy dinı ahýal jaıly sóz qozǵady.

«Árkim óz úıinde taraýıh namazyn otbasymen óteıdi. Kópshilik oryndarda (dámhana, meıramhana jáne taǵy basqasy) jınalmaýǵa úndeımiz. Qazirgi jaǵdaıǵa qaraı oraza ustaǵan adamdarǵa aýyzashar berýdiń ornyna, kelesideı amaldardy jasaýǵa shaqyramyz. Meıramhanalarǵa tapsyrys berip, aýyzy berik adamdarǵa tamaq taratýǵa bolady. Áleýmettik jaǵdaıy tómen otbasylarǵa azyq-túlik berý, aýyzasharǵa jumsalatyn shyǵyndardy oraza ustaǵan adamdarǵa qarjylaı berý de mol saýap bolady», – dedi Musabek Aqtamberdi.

Bas ımam budan ózge musylman qaýymyn sabyr saqtaýǵa, orynsyz úreılenbeýge jáne halyqty dúrliktirmeýge shaqyrdy. Bastysy, Alla Taǵalaǵa duǵa etýge shaqyrady. Aıta keteıik, jalpy Túrkistan oblysynda Qazaqstan musylmandary dinı basqarmasynyń 748 meshiti jumys isteıdi.