Túrkistan túnde de jaıly ári qaýipsiz bolýy tıis - Ómirzaq Shókeev
Aımaq basshysy qaladaǵy eki shaqyrym jerde jańadan ornatylǵan jaryqtandyrý jelisiniń qurylysyn kórip, tanysty. Zamanaýı úlgidegi aqyldy syrtqy jaryqtandyrý júıesiniń shamdary ylǵalǵa, kez-kelgen aýa-raıyna tózimdi. Elektr qýatyn tutynýda únemdi ári ony qashyqtan basqaryp otyrýǵa bolady.
Túrkistan oblysy ákiminiń baspasóz qyzmetiniń málimetinshe, kóshelerde beınebaqylaý kameralary da ornatylǵan. Bul quraldar turǵyndardyń qaýipsizdigin qamtamasyz etý maqsatynda qoıylǵan. Sonymen qatar shuǵyl jaǵdaı oryn ala qalǵan kezde tártip saqshylarynyń jedel áreket jasaýyna septigin tıgizedi. Alaıda kamera qalanyń sanaýly kóshesinde ǵana kezdesedi.
Al, barlyq kóshege ornatý máselesi qarjyǵa kelip tireledi. Sondyqtan pılotty jobada usynylǵan jaryq jelisi áli qarastyrylatyn bolady. «Zamanaýı úlgidegi syrtqy jaryqtandyrý júıesiniń shamdary ylǵalǵa, kez-kelgen aýa-raıyna tózimdi bolǵany durys. Onyń ústine elektr jaryǵyn tutynýda únemdi bolǵany da qolaıly. Bastysy - Túrkistan túnderi jaryq ári qaýipsiz bolýy kerek», - dedi Ómirzaq Shókeev.
Qala basshylyǵynyń aıtýynsha, aldaǵy ýaqytta Túrkistan kóshelerinde syrtqy jaryqtandyrý jelisi múmkindiginshe jańartylady. Jyl sońyna deıin kósheniń 24 paıyzy jaryqshamdarmen qamtylady dep kútilýde.
Aımaq basshysy bul kúni oblys ortalyǵynda jańadan boı kótergen «Aqjaıyq» mýzykalyq mektebinde de boldy. Batys Qazaqstan oblysy tartý etken eki qabatty ǵımarattyń qurylys jumysy qazir tolyq aıaqtalǵan. Dızaıny erekshe úlgide salynǵan nysan jaqyn arada paıdalanýǵa berilmek. Mýzykalyq mekteptiń 550 orynǵa eseptelgen kontsert zaly, konferents zaly, orkestrlik bólmeleri jáne demalys aımaǵy bar. Al, qabyrǵalary joǵary sapaly akýstıkalyq panelmen qaptalǵan. Óner shańyraǵy barlyq mýzykalyq aspaptarmen de qamtylǵan.