«Turkistan Textile» tigin fabrıkasy jylyna 15 000 toqyma ónimin óndirýge qaýqarly

TÚRKІSTAN. QazAqparat - Túrkistan qalasynyń ındýstrııalyq aımaǵynda 2 ga jerde ornalasqan «Turkistan Textile» tigin fabrıkasynyń jumysy jandanyp keledi, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.

Qazaqstan jáne Ózbekstan respýblıkalarynyń birlesken kásipornynyń qurylysy 3 aıǵa jýyq rekordtyq merzimde aıaqtalǵan. Zaýyt tolyq iske qosylǵanda 1000 adamǵa deıin jumys orny ashylatyn bolady.

Toqyma ónimderin óndiretin tigin fabrıkasy saltanatty túrde QR Premer-Mınıstri Asqar Mamın men Ózbekstan Premer-Mınıstri Abdýlla Arıpovtyń qatysýymen ashylǵan bolatyn. Búginde kásiporyn óz ónimin óndirýge kiristi.

Investor qyzmetkerlerdi jaldaý kezinde múmkindigi shekteýli áıelder men turmysy tómen otbasylardan shyqqan adamdarǵa jumys oryndaryn usynýǵa basa nazar aýdarýǵa nıetti. Sonymen qatar, Túrkistan joǵary kópsalaly qolóner kolledjiniń stýdentterine praktıkalyq daǵdylardy ıgerýge múmkindik beriledi.

Baýyrlas memleketterdiń arasyndaǵy yntymaqtastyqty keńeıtý aıasynda iske asyrylǵan jobanyń bastamashysy – «Qojakent Textile» JShS kompanııasy. Kásiporyn jyl saıyn 15 000 birlikke deıin toqyma ónimderin óndirýdi josparlap otyr.

Tigin fabrıkasy túrli arnaıy kıimder (medıtsınalyq halattar, ýnıformalar) men syrtqy kıimderdi, «Ataman jáne Ramsay» brendterimen erlerge jáne áıelderge arnalǵan kostıýmderdi shyǵarýdy jolǵa qoımaq. Jalpy zaýytqa tartylǵan ınvestıtsııa somasy shamamen 420 mln. teńgeni quraıdy.