Túrkistan oblysynyń zııalylary Elbasy maqalasyna pikir bildirdi
Jazýshy Marhabat Baıǵut «Uly Dalanyń jeti qyry» atty maqalany oqyp otyryp, qazaq halqynyń tereń tarıhy jóninde taǵylymdyq tustary kóp ekenin aıtady.
«Jańa dúnıeniń árbir sózine, árbir sóılemine, árbir oı-pikirine, qaǵıdattary men tujyrymdaryna raqattanyp, álemdik ádemi áńgime retinde qabyldadym. Shynynda da Prezıdent kúlli adamzat, búkil dúnıe júziniń órkenıetti qaýymy, barsha elder barynsha nazar aýdararlyqtaı álemdik deńgeıdegi, parasattyń shyrqaý bıigindegi paıymdardy ortaǵa salyp otyr. Sonymen qatar, naqtyly ǵylymı derekterge súıenip, jahandyq tarıhtaǵy Uly Dala Eliniń, qazaq ultynyń, Qazaqstan Respýblıkasynyń orny men rólin jan-jaqty aıqyndap bergen»,- deıdi M.Baıǵut.
Onyń sózinshe, maqalada Túrkistan oblysynyń qurylýy, onyń bolashaǵy, Ál-Farabı men Ahmet ıAsaýıdyń týynylary, batyrlar jyry, óńirde jıi kezdesetin qyzǵaldaq pen sıvers almasyna deıin aıryqsha aıtylýy qanat bitiredi.
Atalǵan maqala jóninde aqyn, etnograf, «Dástúr» jýrnalynyń bas redaktory Qasymhan Begmanov ta óz oıyn bildirdi. Qalamgerdiń pikirinshe, Elbasynyń «Uly dalanyń jeti qyry» maqalasynda aıtylǵan «Túrki órkenıeti: túp tamyrynan qazirgi zamanǵa deıin» atty joba - rýhanı jańǵyrý baǵdarlamasyna oraı qolǵa alynatyn eleýli jobalardyń biri bolmaq.
«Bul joba boıynsha 2019 jyly Astanada Túrkologtardyń dúnıejúzilik kongresin uıymdastyrý, álem elderiniń mýzeılerine ejelgi túrik jádigerlerin qoıyp, halyqqa keńinen tanystyrý, Túrki halyqtarynyń mádenı kúnderin uıymdastyrý, túrki halyqtaryna ortaq rýhanı qazyna - onlaın kitaphana ashý sekildi aýqymdy ister qolǵa alynsa, túrki órkenıeti qaıta jandanatyn bolady. Sondaı-aq, kóne qala - Túrkistannyń oblys ortalyǵy bolýymen qatar, onyń ejelgi bedelin qaıta kóterý, qalany rýhanı hám ekonomıkalyq turǵydan damytý - búkil túrki álemi úshin úlken jetistik bolady dep senemin»,- deıdi Qasymhan Begmanov.