Túrkistan oblysynyń Túlkibas aýdanyna «Rýhanı kerýen» kelip jetti

TÚLKІBAS. QazAqparat –Elbasy Nursultan Nazarbaevtyń «Bolashaqqa baǵdar:rýhanı jańǵyrý» baǵdarlamalyq maqalasy aıasyndaǵy «Rýhanı kerýen» Jetisý jerinen Túrkistan oblysynyń Túlkibas aýdanyna kelip jetti, dep habarlaıdy QazAqparat tilshisi.

Kerýendi aýdan ákiminiń orynbasary E.Kúzembaev pen aýdandyq máslıhat hatshysy S.Seısenbaev bastaǵan bir top zııaly qaýym ókilderi, aýdan turǵyndary qarsy aldy. Jambyl oblysynyń shekarasynan qonaqtardy qýana kútip alǵan jergilikti halyq qonaqjaılylyqtaryn kórsetti. Jetisýlyqtar óńirinen sol mańda ornalasqan stellany aralap, oblys aýmaǵyndaǵy barlyq aýdannyń tólqujattarymen tanysty. Shara barysynda aýdandyq mádenıet bóliminiń qyzmetkerleri tarapynan patrıottyq turǵydaǵy ánder oryndalyp, qonaqtarǵa Túlkibastyń almasy men túrli taǵamdar usynyldy. Aıta keteıik, aǵymdaǵy jyly «Rýhanı kerýen» jobasynyń ІІІ kezeńi 6 baǵyt boıynsha júzege asyrylýda. Atap aıtqanda, Almaty oblysyna qarasty 11 aýdanynyń shekara aımaqtaryn qamtydy. Bıylǵy jyly «Rýhanı kerýen» jobasynyń arnasy keńeıtilip, «Jer jánnaty – Jetisý jerinen Túrki halyqtarynyń kıeli mekeni – Túrkistan óńirine» sapar shegý josparlandy. Jobanyń maqsaty Qazaqstan halqynyń dástúrli rýhanı mádenıetin elimizde ilgeriletý, memleketimizdiń rýhanı tiregi bolǵan asyl dinimizdiń jalpyǵa ortaq adamgershilik qaǵıdalaryn dáripteý bolyp tabylady. Sapardyń maqsaty - Elbasynyń «Rýhanı jańǵyrý» baǵdarlamalyq maqalasy men din salasyndaǵy memlekettik saıasatty júzege asyrý, áriptestik baılanysty nyǵaıtý, salt-dástúrlerimiz ben taǵylymy mol tarıhymyzdy dáripteý, olardy qasterleý.