Túrkistan oblysynyń trassalaryna «Sergek» kamerasy ornatylýda

TÚRKІSTAN. QazAqparat - Túrkistan oblysynyń «Túrkistan-Shymkent» baǵytyna qoıylǵan Kókaral, Spataev aýyldary mańyndaǵy beınebaqylaý kameralary búginnen bastap iske qosyldy, dep habarlaıdy QazAqparat tilshisi.

Jyl basynan beri oblysqa qarasty respýblıkalyq jáne halyqaralyq mańyzy bar trassalarda – 57, jergilikti mańyzy bar avtojoldarda 73 jol-kólik oqıǵasy tirkeldi. Jalpy óńir boıynsha 212 jol-kólik apaty boldy, saldarynan 286 adam jaraqattandy, 51-i ajal qushty.

Mamandar oblys aýmaǵyndaǵy jol-kólik oqıǵalarynyń jartysynan astamy jyldamdyqty shekten tys asyrýdan oryn alatynyn aıtýda. Sondyqtan oblystaǵy respýblıkalyq mańyzy bar joldarǵa «Sergek» vıdeobaqylaý júıeleri ornatylýda.

«Atalǵan beınebaqylaý kameralary jyldamdyqty shekten tys asyrǵan kólikti der kezinde anyqtaıdy. Barlyq «Sergek» júıeleriniń aldynda eskertý belgileri ornatylǵan. Sondyqtan jolda muqııat bolyp, jolda júrý erejesin saqtańyzdar, qurmetti júrgizýshiler!», - deıdi Túrkistan oblysy polıtsııa departamentiniń ákimshilik polıtsııa basqarmasynyń bastyǵy Almashan Tastanbekov.