Túrkistan oblysynyń taýly aýdandarynda jylytý maýsymy bastaldy

TÚRKІSTAN. QazAqparat - Túrkistan oblysyndaǵy bıýdjettik mekemelerge qajetti 169,1 myń tonna kómir tolyq tasymaldanǵan. Búgin bul týraly Túrkistan oblystyq óńirlik kommýnıkatsııalar qyzmetinde ótken brıfıngte Energetıka jáne turǵyn úı-kommýnaldyq sharýashylyq basqarmasynyń basshysy Marǵulan Maraıym málim etti, dep habarlaıdy QazAqparat tilshisi.

Basqarma basshysynyń aıtýynsha, oblystaǵy 2830 bıýdjettik mekemeniń barlyǵy qysqy maýsymǵa daıyn. Ortalyqtandyrylǵan jylýmen qamtamasyz etetin mekemelerge qajetti 106,6 myń tonna kómir jetkizilgen. Al, oblystaǵy temir jol stantsııasy qoımalaryndaǵy «Shubarkól» kómiri  tonnasyna  14-15  myń teńge,  «Botaqara» kómiri 10-11 myń teńgeden bosatylýda.

 «Oblys boıynsha jeke turǵyndardyń aldaǵy kúzgi-qysqy kezeńdegi   kómir otynyna degen jalpy qajettiligi -  902 myń tonna,  búgingi  kúnge   temir  jol stantsııalaryndaǵy  qoımalarǵa tasymaldanǵany - 689,1 myń tonna. Oblystaǵy  ortalyqtandyrylǵan jylýmen qamtamasyz etiletin kópqabatty turǵyn úılerdiń sany - 544,   olar jylý  berý maýsymyna  tolyq daıyn. Derbes qazandyqtardyń sany - 10, barlyǵy qysqy maýsymǵa daıar. Oblystyń jylý berý daıyndyǵyna apta saıyn turaqty monıtorıng júrgizilýde», - dedi Marǵulan Zulharnaıuly.

 Budan bólek, mazýt otynyna degen oblys boıynsha qajettilik kólemi 10 myń tonna bolyp otyr. Energetıka mınıstrligimen tasymaldaý kestesi bekitilip, kelisimshart jasalǵan.

 Aıta keterligi, oblystyń soltústik jáne taýly Sozaq, Tólebı, Túlkibas aýdandarynda 15 qazannan bastap jylý berildi.