Túrkistan oblysynyń sharýalary 654 myń tonna ónim eksporttady

TÚRKІSTAN. QazAqparat - Jyl basynan beri Túrkistan oblysynyń sharýalary 654 myń tonna ónim eksporttasa, onyń jalpy quny 69,9 mln AQSh dollaryn quraǵan. Búgin bul týraly oblys ákimdiginde ótken brıfıngte Túrkistan oblystyq aýyl sharýashylyǵy basqarmasynyń basshysy Nurbek Badyraqov málim etti, dep habarlaıdy QazAqparat óńir basshysynyń baspasóz qyzmetine silteme jasap.

Sońǵy jyldary mal etin óndirýde Túrkistan oblysy elimizde kósh bastap keledi. Aıtalyq, sońǵy 7 aıda Túrkistan oblysynan Ózbekstan, Reseı elderine 4 100 tonna sıyr, Ózbekstan, Iran, Bahreın, Reseı elderine 243,8 tonna qoı, Ózbekstan, Reseı elderine 33,8 tonna jylqy etteri shyǵaryldy. Osy jumystardyń nátıjesinde iri qara mal etin eksporttaýda Túrkistan oblysy elimizde aldyńǵy qatardan kórinip otyr.

Budan bólek, óńirde qaıta óńdelgen aýyl sharýashylyǵy ónimderiniń eksport kólemi 43,4 myń tonnaǵa jetken. Al qarjylyq áleýeti 40,5 mln AQSh dollaryn quraǵan. Bul kólem jyl sońyna deıin 97,2 mln AQSh dollaryna jetedi dep josparlanýda.
Sondaı-aq, óńirden 1 445,9 tonna balyq ónimderi Eýropanyń Germanııa, Lıtva jáne Reseı, Ýkraına, Ózbekstan elderine jóneltilse, 11,2 tonna shujyq ónimderi men 1 468 tonna qus eti Reseıge eksportqa shyǵarylǵan.