Túrkistan oblysynyń polıtseıleri birneshe kókpar oıynyna tosqaýyl qoıdy

TÚRKІSTAN. QazAqparat - Túrkistan oblysy Bas memlekettik sanıtarııalyq dárigeriniń qaýlylarynyń negizinde, karantın rejımi kezinde birqatar shekteý sharalary qoıylǵan.

Osy baǵytta Ordabasy aýdandyq polıtsııa bóliminiń polıtseıleri karantın rejımin saqtaý úshin qurylǵan toppen birge profılaktıkalyq jumystardy turaqty túrde júrgizip keledi, dep habarlaıdy QazAqparat Túrkistan oblysy polıtsııa departamentiniń baspasóz qyzmetine silteme jasap.

Osyndaı kezekti reıd barysynda, kúndizgi saǵat 15:30 shamasynda Saryaǵash aýdanynyń aýyldarynyń birinde kókpar oıynynyń ótip jatqany anyqtalǵan. Uıymdastyrylǵan «Bata kókpar» oıyny toqtatylyp, 200-den astam adam tarqatyldy.

Sondaı-aq Otyrar aýdanynda jasyryn túrde kókpar oıyny uıymdastyrylǵan. Atalǵan jıynǵa 150-den astam adam jınalyp, tártip saqshylarynyń tabandy eńbekteriniń arqasynda, der kezinde turǵyndardyń qaýipsizdigi úshin kókpar oıyndary toqtatyldy.

Osyǵan oraı karantın rejımin jáne shekteý sharalaryn saqtamaǵan turǵyndarǵa qatysty is-qujattar jınaqtalyp, zańdy sheshim qabyldaý úshin QR QK-niń 425-baby «Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» boıynsha jınaqtalǵan qujattar aýdandyq sanıtarlyq epıdemıologııalyq baqylaý basqarmasyna joldandy.

Óz kezeginde Túrkistan oblysynyń polıtseıleri azamattardy karantın rejımin qatań saqtaýǵa, medıtsınalyq betperde kııýge jáne áleýmettik qashyqtyqty saqtaýǵa shaqyrady.