Túrkistan oblysynyń oqýshylaryna 57 myńnan astam kompıýter satyp alynǵan

TÚRKІSTAN. QazAqparat - Túrkistan oblysyndaǵy mektep oqýshylary josparǵa sáıkes, aǵymdaǵy jyldyń 30 qazanyna deıin qashyqtan oqytýǵa arnalǵan qurylǵylarmen tolyq qamtylady. Bul jaıynda óńirlik kommýnıkatsııalar qyzmetine silteme jasap QazAqparat habarlaıdy.

Búginge deıin jalpy 7711 planshet pen 5952 kompıýter alyndy. Sondaı-aq, 2 aıǵa arnalǵan «Bilim» tarıfi qosylǵan sım-karta qosa beriledi.

Bul týraly oblystyq adamı áleýetti damytý basqarmasynyń basshysy Raqymbek Jolaev óńirlik kommýnıkatsııalar qyzmetinde ótken brıfıngte málimdedi.

«Óńirdegi oqýshylardy qashyqtan oqytý maqsatynda QR Úkimeti rezerviniń qarajatynan qazan aıynyń 30-na deıin 57 190 kompıýterlik qurylǵy satyp alý josparlanǵan. Qazirgi tańda, bul tehnıka Shymkent qalasyndaǵy qoımaǵa jetkizildi. Qurylǵylardy Túrkistan oblystyq adamı áleýetti damytý basqarmasy janynan qurylǵan komıssııa músheleri qabyldap aldy. Endi kompıýterler men noýtbýktar az qamtamasyz etilgen jáne kópbalaly otbasylarǵa, ata-ana qamqorlyǵynsyz qalǵan oqýshylarǵa, erekshe bilim alýdy qajet etetin balalarǵa úlestiriledi», – dedi Raqymbek Qýatbekuly.

Aıta keteıik, Túrkistan oblysynda 912 jalpy bilim beretin mektepte 502 737 oqýshy bar.

Búginde onyń 446 109-y qashyqtan oqytý formatynda bilim alyp júr.