Túrkistan oblysynyń myńǵa jýyq turǵyny soltústik óńirlerge qonys aýdardy

TÚRKІSTAN. QazAqparat – «Nur Otan» partııasy Túrkistan oblystyq fılıaly «Eńbek» baǵdarlamasy boıynsha halyq arasynda aqparattandyrý jumystaryn bastady. Partııa ókilderi Elbasynyń bastamasymen 2015 jyldan beri júzege asyp kele jatqan baǵdarlama aıasynda halyqty tyǵyz qonystanǵan ońtústikten soltústikke kóshirý jumystaryn keńinen nasıhattaý maqsatynda jıyn ótkizdi, dep habarlaıdy QazAqparat tilshisi.

Jıyndy «Nur Otan» partııasynyń Túrkistan oblystyq fılıaly tóraǵasynyń birinshi orynbasary Beısen Tájibaev ashyp, osy baǵytta atqarylyp jatqan jumystar barysyn baıandady.

«Elbasy N.Nazarbaevtyń tapsyrmasy boıynsha 2015 jyldan bastap elimizdiń jumys kúshi az soltústik óńirlerine halqy tyǵyz ornalasqan ońtústik aımaqtardan halyqty óz erkimen qonystandyryp, olarǵa qajetti jaǵdaı jasaý jumystary bastalǵan bolatyn. Osy oraıda, «Nur Otan» partııasy Túrkistan oblystyq fılıaly ishki kóshi-qon protsesterin retteý jáne eńbek kúshi mol aımaqtan, eńbek kúshi jetispeıtin respýblıkamyzdyń soltústik óńirlerine óz erkimen halyqty qonystandyrý jumystaryn nasıhattaýdy qolǵa aldyq», - dedi Beısen Tájibaev.

Atalǵan baǵdarlamany júzege asyrý barysy óńirde 2015 jyldan beri bastalyp, búgingi tańda 881 otbasy nemese 3 377 adam qonys aýdarǵan. Olar memleket tarapynan beriletin túrli áleýmettik kómektermen qamtamasyz etilgen. Halyqty qonys aýdarýǵa yntalandyrý maqsatynda Soltústik óńirlerdiń ókilderi kezeń-kezeńimen oblysta túsindirý jumystaryn júrgizýge birneshe kezdesý ótkizýde. Sonymen qatar soltústik, shyǵys óńirlerindegi bos jumys oryndary týraly málimet aı saıyn alynyp, aýdandyq, qalalyq jumyspen qamtý ortalyqtarynyń bazalyq málimetterine engizilip otyr. Tek aǵymdaǵy jyldyń І toqsanynda 3 myńǵa jýyq jumys oryndary usynyldy.

Aıta keteıik, 2018 jylǵa respýblıka boıynsha bólingen 1 706 kvota negizinde oblystan 455 otbasy, 1 768 adam soltústik óńirlerge qonys aýdarǵan. Olar kvotamen, kóshý úshin beriletin sýbsıdııamen qamtamasyz etilýde. Turaqty mekenjaılaryn aýystyrǵandardyń basym bóligi Saryaǵash (91 otbasy), Saıram (63 otbasy), Maqtaral (75 otbasy), Ordabasy (49 otbasy) aýdandarynyń turǵyndary. Al, bıylǵy jyly oblystan 427 otbasy, 1 608 adam kóshirý josparlanyp otyr. Qazirgi tańda 284 otbasy nemese 911 adam soltústik óńirlerge qonys aýdardy. Olar Qostanaı, Shyǵys Qazaqstan, Soltústik Qazaqstan jáne Pavlodar oblystaryna qonys aýdardy.

Eske salaıyq, «Eńbek» baǵdarlamasyna qatysýshyǵa jáne onyń otbasy múshelerine – otaǵasyna jáne árbir otbasy múshesine bir ret 35 AEK (88 375 tenge) mólsherinde kóshýge materıaldyq kómek beriledi. Búgingi tańǵa deıin Túrkistan oblysynan qonys aýdarǵandardyń basym bóligi turǵyn úımen, jumysqa qabiletti otbasy músheleri jumyspen qamtylǵan. Óz kásibin ashamyn deýshilerge egin , mal sharýashylyǵymen shuǵyldanýǵa jer telimderi berilýde. Bos turǵan ǵımarattar usynylyp, sonda qonystanyp jatyr. Barǵan azamattar sondaı-aq, kóship-qonýǵa baılanysty memleket tarapynan beriletin materıaldyq kómektermen qamtamasyz etilýde.