Túrkistan oblysynyń qurylýy óńirdiń damýyna tyń serpin beredi - Sapar Ahmetov

ASTANA. QazAqparat - Májilis depýtaty Sapar Ahmetovtiń paıymynsha, Túrkistan oblysyn qurýdyń tarıhı sheshimi jaqyn arada óz jemisin beredi, dep habarlaıdy QazAqparat tilshisi.

«Qazirgi kezde Shymkent qalasynyń ekonomıkalyq ári áleýmettik jaǵdaıy jaǵynan múmkindigi joǵary qalalardyń biri ekeni belgili. Sondyqtan respýblıkalyq qala ataný deńgeıine ábden laıyqty úlken shahar dep bilemiz. Al endi Túrkistan oblysynyń paıda bolǵany búkil qazaq halqynyń, Qazaqstannyń mereıli jaqsy jańalyǵy dep oılaımyn. Osy oraıda Elbasynyń sheshimi óte durys ekenin halqymyz quptap otyr. Túrkistan - ol qazaqtyń úlken qara shańyraǵy, bizdiń halqymyzdyń maqtanyshy. Bul turǵyda osy óńirdiń jańa mártebege ıe bolǵany óte mańyzdy», - dedi Sapar Ahmetov.

Onyń paıymynsha, Túrkistan oblysynyń qurylýy ekonomıkalyq, áleýmettik, rýhanı máselelerde óńirge tyń serpin beretin bolady.

«Prezıdent keshe ǵana bergen óziniń tapsyrmalarynyń arasynda týrıstik salany damytýǵa erekshe ekpin qoıdy. Sondyqtan óńir basshylyǵy bul baǵytqa aıryqsha mán beredi degen pikirdemin. Jalpy, Elbasynyń Jarlyǵymen bekitilgen tarıhı sheshimniń jemisin biz jaqyn arada kóremiz dep oılaımyn», - dedi depýtat.

Budan buryn habarlanǵandaı, Elbasy Nursultan Nazarbaev Túrkistan oblysynyń paıda bolýyna baılanysty pikir bildirdi.

Sonymen qatar, Prezıdent jańa oblys ortalyǵynyń qurylýyna baılanysty birqatar tapsyrmalar berdi.