Túrkistan oblysynyń keıbir aýdandarynda shirkeı qaptap ketti
Shirkeıdiń kóptigi sonsha, turǵyndar betterin tumshalap alýǵa májbúr. Áleýmettik jelide jarııalanǵan vıdeo avtorynyń aıtýynsha, shirkeıler jumyrtqa ashqan qyrǵaýyldyń balapandaryn jep qoıǵan.
«Tipti, qoıan kójekteri men tóldegen sıyrdyń buzaýy jáne jylqylardyń qulyndary ólip ketip jatyr», - deıdi avtor.
Al, atalǵan máselege resmı túrde jaýap bergen Otyrar aýdanynyń ákimdigi eldi mekenderde jándikter men ózge de zııankesterge qarsy dárileý, dezınsektsııalaý jumystary júrgizililip jatqanyn jetkizdi.
«Túrkistan oblysy energetıka jáne turǵyn úı-kommýnaldyq sharýashylyǵy basqarmasynyń tapsyrysyna sáıkes dernásil shirkeılermen kúresý úshin «bacillus thuringiensis» bakterııalyq preparattaryn sýǵa jiberý ádisi qoldanylyp jatyr. Al, sý qorǵaý aımaqtarynda, ıaǵnı jaǵalaýdaǵy aǵashtardyń butalary men eldi mekenderde, demalys aýmaqtarynda hımııalyq ınsektıtsıdter óńdeý ádisin qoldaný arqyly tıisti dárileý jumystary atqarylady», - delingen habarlamada.
Sondaı-aq, shirkeımen kúres Arys qalasynyń aýmaǵynda da júrip jatyr. Qala ákimdigi baspasóz qyzmetiniń málimetinshe, eki kezeń boıynsha iske asatyn jumystar adam kóp shoǵyrlanatyn aımaqtardan bastalǵan.