Túrkistan oblysynyń dıqandary tuqymy Túrkııadan jetkizilgen elıtaly maqta ósirip jatyr

TÚRKІSTAN. QazAqparat – Túrkistan oblysyna Túrkııadan elıtaly maqta tuqymdary jetkizilip jatyr. Bul týraly Túrkistan oblysy ákiminiń orynbasary Ermek Kenjehanuly maqtashylarmen ótken kezdesýde málimdedi, dep habarlaıdy QazAqparat tilshisi.

Túrkistan oblysynyń klımaty jyly bolǵandyqtan iri óndiristik kásiporyndarǵa qaraǵanda aýyl sharýashylyǵy salasy jaqsy damyǵan aımaq. Sonyń ishinde maqtanyń orny bólek.

Bıyl shıtti maqta sapasyn jaqsartý maqsatynda Túrkistan oblysy men Túrkııa memleketi arasynda yntymaqtastyq ornatylyp, ónimdiligi joǵary sapaly maqta tuqymyn ımporttaýǵa múmkindik týdy. Nátıjesinde, Túrkııa elinen 248,2 tonna elıtalyq tuqym, Ózbekstan memleketinen 967,5 tonna tuqym jetkizildi.

«Maqta máselesi jyl on eki aı kún tártibinen túsken emes. Baǵany kóterý, sýbsıdııa berý, tereń óńdeý kásiporyndaryn ashý syndy sharýalardyń usynys-tilekteri oblys ákimdiginiń basty nazarynda. Agroqurylymdardyń satyp alǵan tuqymynyń qunyn arzandatýǵa bıylǵy jyly 600,0 mln teńge qarjy bólinip, maqta sharýashylyqtaryna 150,0 mln teńge qarjy tóleý josparlanyp otyr», - dedi Ermek Kenjehanuly.

Ótken jyly Túrkııadan 105 tonna elıta, Ózbekstannan 423 tonna ekinshi kóbeıtilgen tuqym ımporttalyp egiske paıdalanylǵan. Al bıyl bul kórsetkish eki ese artyp otyr.

Aıta keteıik, ońtústikte maqta sharýashylyǵymen aınalysatyndar sany 25 myńnan kóp.